Tavos i dalin të palarat në Gjirokastër, Luftëtari në prag të shpërbërjes

Na ndiqni në Facebook dhe Instagram:
  • Facebook
  • Instagram
  • Youtube

Kur para pak javësh futbollistët e Luftëtarit dhanë alarmin për 5 paga të vonuara dhe kërcënuan me bojkot, Luftëtari përgënjeshtroi mediat, duke pretenduar se ishin vetëm 2 paga të vonuara dhe se gjithçka do zgjidhej shpejt. Më pas klubi njoftoi se depozitoi një pagë dhe kishin mbetur edhe dy pa paguar, duke dalë në kundërshtim me veten në lidhje me muajt pa paguar.

Tani dalin në dritë të palarat e klubit gjirokastrit, që qenka në kolaps total dhe më në fund e pranon edhe vetë, sepse një shkresë zyrtare nga drejtori sportiv Rigers Malile i është dërguar gazetës Panorama-Sport, që ka demaskuar drejtuesit e klubit, deri dje të prerë në qëndrimet zyrtare se skuadra nuk kishte halle financiare.

Malile u ka dërguar një shkresë zyrtare aksionerëve të klubit, Vangjel Tavo, Grigor Tavo e Bekim Halilaj, ku ndër të tjera u thotë: “Mbi 5 futbollistë kanë kërkuar ndërprerjen e kontratës në bazë të rregullores dhe në janar do të largohen duke marrë edhe pagat e prapambetura, sipas rregullores. Në këtë moment skuadra është e shpërbërë, nuk kemi fonde jo vetëm për pagat, por as për të vazhduar kampionatin, sepse nuk paguajmë dot transportin dhe hotelin. Restoranti ku ushqehen futbollistët nuk pranon të vijojë bashkëpunimin më tej, pa u paguar, ndërsa lojtarët mund të mbeten në rrugë, për shkak se nuk janë paguar qiratë e shtëpive ku banojnë. Kërkohet ndërhyrje urgjente nga ju, që të shmanget shkatërrimi total“.

Rrënimi i Luftëtarit ka nisur që në verë, kur u larguan disa nga yjet e skuadrës, u bë çorap ekipi duke larguar trajner e lojtarë veteranë dhe duke afruar lojtarë anonimë nga jashtë, si dhe trajner të huaj pa eksperiencë. Më pas erdhën ndeshjet skandaloze në Europa League dhe ndeshja e luajtur në Elbasan kundër Ventspils është nën hetim nga UEFA, që pritet ta përjashtojë për shumë vite Luftëtarin nga kupat e Europës, por pritet edhe të mos ia akordojë premion që i takon për pjesëmarrjen në Europë, çka shton hallet financiare të klubit.

Sondazh: Votoni personazhin e vitit 2018 në Gjirokastër (lista me 10 kandidatë)