Eduard Rroca i ka munguar shumë Luftëtarit në ndeshjet europiane. Mesfushori ka kaluar një dëmtim dhe është shumë pranë rikuperimit, ndërkohë që për të ka një interes konkret nga Shkëndija e Tetovës. Drejtuesit e saj duket se e shohin lojtarin e Luftëtarit si zëvendësuesin ideal të Hasanit, tashmë i larguar nga tetovarët. 

Mësohet se klubi nga Tetova ka bërë një ofertë për mesfushorin Eduard Rroca në klubin gjirokastrite, por presidenti Tavo ka thënë “Jo”. Ai kërkon 100 mijë euro nga Shkëndija për këtë futbollist, si dhe të mbajë një vlerë të caktuar të kartonit.

Palët janë ende në bisedime dhe në të ardhmen mund të gjejnë një akord, por të paktën për momentin presidenti Grigor Tavo duket i vendosur për të mos u ulur aspak në kërkesat e tij. Ditët në vazhdim do të tregojnë se çfarë do të ndodhë, nëse Rroca do të qëndrojë në Gjirokastër, apo do t’i bashkohet ekipit tetovar, ku pak ditë më parë kaloi edhe mbrojtësi Gledi Mici.

Mesfushori shumë shpejt do të jetë 100 gati, pas një faze rikuperuese që e ka mbajtur larg fushave që para fundit të sezonit të kaluar.