Në Parkun Kombëtar “Bredhi i Hotovës – Dangelli”, i cilësuar një thesar vlerash natyrore, janë vendosur ditët e fundit tabela informuese për vizitorët.
Administrata e Zonave të Mbrojtura në Gjirokastër bën të ditur se tabelat informuese u vendosën në Kanionin e Kamenckes, dhe zonën qendrore të tij”.
Sipas ADZM, Gjirokastër, pas vendosjes së tabelave u pastrua edhe rruga nga drurët dhe degët e rëna nga reshjet e fundit.
Ky park po preferohet gjithnjë e më shumë nga turistët e huaj, të cilët gjatë kësaj vere kanë shijuar bukuritë natyrore të këtij parku, përmes edhe udhëtimeve me kuaj.
Bredhi i Hotovës është Park Kombëtar, ndodhet në jug të Shqipërisë, pak kilometra nga qyteti i Përmetit dhe mund të cilësohet si mushkëria natyrore e Shqipërisë Jugore.
Me një shtrirje prej 1200 hektarësh dhe një masiv të mrekullueshëm të përbërë kryesisht nga Bredhi Maqedonas, ky Park Kombëtar është një nga perlat turistike të Shqipërisë, që ofron surpriza të këndshme në çdo stinë të vitit, si në dimër, ku ai është i mbuluar nga dëbora, por dhe në verë ku mund të shijosh freskinë e tij.
Pamja madhështore e parkut të shfaqet nga hyrja e luginës së Lumicës e deri afër majës së malit të Kokojkës. Bredhi i Hotovës konsiderohet një nga reliket bimore mesdhetare më të rëndësishme në vend dhe është një nga parqet më të mëdhenj në Ballkan me Bredh Maqedonas.
Aty përveç bredhit gjen disa lloje panjash, shkozë të zezë, ilqe, dëllinjë të kuqe dhe të zezë, mjedër etj. Në lartësinë 800-1000 metra takohen livadhe e vende të sheshta të rrethuar nga drurë shekullorë të përmasave të mëdha. Parku formon një kurorë të gjelbër gjigante me kontraste të dukshme nga njëra-tjetra.
Bota shtazore është e pasur. Nga gjitarët takohen ariu i murrmë, ujku, dhelpra, kunadhja, derri i egër, lepuri i egër, ketri etj. Por krenaria e këtij parku dhe përfaqësuesi tipik i tij është kaprolli, të cilin mund ta shohësh në livadhe dhe lëndina në thellësi të pyllit.
Bredhi i Hotovës është masivi pyjor më i mbrojtur në Shqipëri, duke i rezistuar deri më tani çdo dëmtimi apo shpyllëzimi nga njeriu.
