Kategoria Superiore do të nisë këtë muaj, jo më 19 siç ishte parashikuar nga FSHF-ja, por më 17. Supersfida Skënderbeu – Partizani që do të luhet në Korçë do të ndezë sezonin e ri futbollistik shqiptar, ndeshje që do të zhvillohet mbrëmjen e së premtes së javës tjetër në orën 19:45.

Katër sfidat e tjera janë të ndara në dy ditë dhe në orare të ndryshme nga njëra-tjetra, që i japin mundësi publikut të mos humbasë asnjë sfidë të javës së parë të kampionatit. Të shtunën do të luhet Luftëtari – Kastrioti në orën 16:45, ndërsa në 19:45 do të jetë ndeshja tjetër, ajo Tirana – Kamza në “Selman Stermasi”.

Në po të njëjtat orare, por që do të luhen ditën e diel, do të jenë sfida Kukësi – Laçi dhe Teuta – Flamurtari. Aktualisht për ndeshjen e verilindorëve me kurbinasit flitet që do të zhvillohet në “Elbasan Arena”, pasi “Zeqir Ymeri” nuk pranohet për shkak të kushteve shumë të degraduara, por edhe për shkak të perimetrit të fushës që është jashtë standardeve të lojës së futbollit.

“Derbi Bregdetar” do të luhet në Durrës, pikërisht në “Niko Dovana” me drita. Teuta ka përforcuar skuadrën, ndërsa Flamurtari ka bërë lëvizje të menduara dhe ka ruajtur boshtin.  Padiskutim, një kampionat i nxehtë na pret, “ethet e gushtit” nisin së shpejti!

JAVA 1

E premte, 17 gusht

Skënderbeu-Partizani 19:45

E shtunë, 18 gusht

Luftëtari-Kastrioti 16:45

Tirana-Kamza 19:45

E diel, 19 gusht

Kukësi-Laçi 16:45

Teuta-Flamurtari 19:45