42 vetë do të humbasin vendin e punës në Bashkinë Gjirokastër apo institucionet në varësi të saj. Në mbledhjen e fundit të Këshillit Bashkiak për vitin 2019 u miratua struktura e re, e cila parashikon reduktim të vendeve të punës dhe rrjedhimisht ulje të shpenzimeve për paga e sigurime shoqërore. Kryebashkiaku Flamur Golemi tha se ky ndryshim ka një efekt prej rreth 110 milionë lekësh, të cilat sipas tij do të investohen apo do t’iu kthehen taksapaguesve në formën e shërbimeve. Sipas Golemit aktualisht Bashkia Gjirokastër ka 632 punonjës.
Me strukturën e re, ky numër do të shkojë në 590 punonjës. Ende nuk është e qartë se cilat pozicione do të reduktohen dhe kush do të humbasë vendin e punës. Megjithatë pak a shumë secili arrin të bëjë vetë llogarinë se sa i dobishëm është në pozicionin e vet. Kryesisht ato pozicione të ‘sajuara’ në kohën kur bashkia drejtohej nga LSI-ja, thjesht sa për të bërë qokat e partisë dhe për zhvatur para nga buxheti i shtetit, janë të parat në listë që do të shkurtohen.
Fjala vjen, kishte vende pune në pozicionin ‘Specialist i Marrëdhënieve me Publikun’ në Ndërmarrjen Komunale (Agjencia e Shërbimeve Publike). Sigurisht që s’jemi duke thënë këtu, se tani që është kryetar Flamur Golemi s’do të bëhen emërime për njerëzit e PS-së, por të ‘shpikësh’ pozicione pune sa për t’i shënuar emrin në bordero dikujt, është abuzim i madh dhe i dënueshëm.
Nëse vërtet kursehen 110 milionë lekë siç thotë Flamur Golemi nga reduktimi i këtyre vendeve dhe ato investohen apo rishpërndahen në forma të tjera tek taksapaguesit, atëherë ia vlen barra qiranë kjo lëvizje. Doemos që kjo nuk do të pritet mirë nga ata që në mars mbeten të papunë apo që deri më sot nuk iu ka thënë askush ‘puna mbarë’, por fiton qyteti një buxhet ekstra prej 110 milionë lekësh që mund të përdoren për investime apo shërbime të ndryshme. Kjo peshon më shumë se dalja nga borderotë e atyre që kryesisht thjesht kanë marrë vetëm rrogën dhe s’e kanë ditur kurrë cfarë ishte puna.
©argjiroja.net
