Reshjet e denduara të shiut në Gjirokastër po krijojnë një tjetër situatë emergjente. Në mesantë vërshimet e ujërave nga përrroi i Çullos kanë qenë të mëdha, duke rrezikuar banorët që kanë shtëpitë aty afër. Në këto kushte dolën në terren edhe ekipet e emergjencave civile të Bashkisë Gjirokastër, si dhe Policia e Shtetit. Për të parë nga afër situatën ishte edhe kryebashkiaku Flamur Golemi.
Eskavatorët kanë nisur të bëjnë ndërhyrjet e lejueshme deri më tani për të evituar vërshimin e ujit mbi shtëpi, edhe pse duket se rreziku s’ka kaluar pasi reshjet e shiut do të vijojnë me intensitet të lartë edhe gjatë ditës së sotme. Ujërat që vërshojnë nga përroi i Çullos kanë qenë vazhdimisht problem për banorët që kanë ndërtuar shtëpi pranë tij. Pothuajse të gjitha ato banesa janë të palegalizuara.
Në mënyrë të habitshme edhe pse aty dihej historikisht se vërshonin ujërat e përroit dhe se ishte një zonë e rrezikshme, janë lejuar ndërtime ndër vite nga Bashkia Gjirokastër. Duket sikur banorëve të ardhur kryesisht nga fshatrat përreth Gjirokastrës iu bë nder me lejimin e ndërtimeve në atë zonë. Por në fakt atyre u është krijuar një telash i madh që do ta kenë gjithë jetën. Frika se mos përroi i Çullos i merr përpara ka për t’i shoqëruar gjithmonë sa herë ka reshje intensive shiu. Shihni pamjet që sjell Argjiirolajm.net
©argjirolajm.net
