Kantieret e veprave publike janë një mundësi fantastike, që politikanët të shfaqen herë pas here qoftë edhe për një foto, duke tentuar në këtë mënyrë të projektojnë tek publiku figurën e njerëzve të punës e fjalës së mbajtur. Përjashtim këtu nuk bën as deputeti socialist i Gjirokastrës, Flamur Golemi. Sot ai ka postuar në faqen e tij në Facebook disa foto nga vizita që bëri në kantierin e rrugës Kardhiq-Delvinë.
Vizita e tij në kantierin e kësaj rruge do të ishte krejt normale dhe e përligjur nëse fjala vjen, Golemi si deputet i qarkut, do të shoqëronte kryeministrin apo ministrin e Transporteve pesë ditë më parë. Por të marrësh rrugën vetëm thjesht për disa foto gjoja sikur po inspekton punimet në kantier, s’është gjë tjetër veçse të bësh propagandë me këtë vepër publike, e cila faktikisht u projektua dhe nisi në kohën e PD-së, por siç thotë me të drejtë Rama, ishte një rrugë që ngeli rrugëve. Si për të forcuar bindjen se vajtja e Golemit në kantier është thjesht për propagandë politike, mjafton të shohësh me detaje fotot që ai ka postuar vetë.
I veshur me jelekun fosforeshent, është kujdesur gjithashtu që një prej fotove ta ketë teksa është duke parë projektin e rrugës, ndonëse aty janë skicime inxhinierike të dala nga ‘Autocadi’. Zor të mendohet se deputeti me profesion mjek, mund të deshifrojë materialin e punuar nga inxhinierët dhe zbatuesit e projektit. Por kështu këshillohet në raste të tilla, politikani duhet të komunikojë edhe përmes gjuhës së trupit; veshjes, qëndrimit përballë aparatit, sfondit etj me radhë.
Ndaj foto të tilla si këto janë praktikë e njohur në fushën e marketingut politik. Sigurisht që Flamur Golemi është në drejtën e vet të shkojë në kantierin e kësaj rruge, qoftë dhe si qytetar i zakonshëm, por kur e dokumenton me foto dhe më pas i ‘shet’ në Facebook si inspektim punimesh kot me veten tënde, jemi përballë elementëve të përdorimit të kësaj vepre publike për propagandë politike, aq më tepër që jemi në prag të zgjedhjeve lokale.
©ArgjiroLajm.net
