S’kanë të sosur kusuret për ish-kryetaren e Bashkisë Gjirokastër, Zamira Rami. Aktualisht ajo ka një çështje të hapur me drejtësinë pasi akuzohet për ‘shpërdorim detyre’ lidhur me disa shpronësime gjatë ndërtimit të një vepre publike. Ndërkohë sot është depozituar në Prokurorinë e Gjirokastrës një tjetër kallëzim penal për Zamira Ramin dhe Ilir Çumakun, shef i Zyrës së Urbanistikës në bashki.
Argjirolajm.net mëson sa ata akuzohen për ‘shpërdorim detyre’. Kallëzuesi është shtetasi Hajdar Topulli, i cili pretendon se Zyra e Regjistrimit të Pasurive të Paluajtshme Gjirokastër, në janar të vitit 2018, në bazë të një vendimi të ish-kryebashkiakes Zamira Rami, ka regjistruar shtëpinë e tij në emër të vëllait, Rakip Topulli. Sipas kallëzuesit, ky regjistrim është i gabuar pasi shtëpia në të cilën ka lindur ai, duhej të regjistrohej si bashkëpronësi e të gjithë anëtarëve të familjes sipas çertifikatës së datës 10.08.1991.
“Z. Prokurori, shtëpia ime është vjedhur. Më është hequr pronësia nga Zamira Rami dhe Ilir Çumaku sepse e dinin që unë banoja nga akti i konstatimit në terren i datës 02.06.2016 ku është si pronar emri im Hajdar Topulli’, thuhet në padinë e depozituar në Prokurorinë e Gjirokastrës.
©argjiroja.net
