Bashkia Gjirokastër vijon me mbjelljen e fidanëve të rinj në qytet. Sot kryebashkiaku Flamur Golemi ishte në lagjen “Kodra e Shtufit”, aty ku dy vite më parë u rrezikua një pallat nga rrëshqitja e tokës. Fidanët e rinj janë ullinj, edhe pse duket pak e habitshme pasi Gjirokastra nuk është se ka klimë të favorshme për ullinjtë. Natyrisht që mbase nuk priten frute prej tyre, mund të jenë thjesht ullinj dekorativ dhe kjo është normale. Problemi është tek kushtet klimaterike jo të përshtatshme në për rritjen e tyre.
Mesazhi i Golemit në Facebook.
Vazhdojmë me mbjelljen e pemëve pa humbur kohë nga periudha e pyllëzimit.Bashkë me nxënës të shkollës “Koto Hoxhi” dhe një nga sipërmarrësit e njohur në qytet në fushën e hotelerisë, Drago Kalemi, mbollëm sot rreth 40 fidanë ullinj në lagjen “Kodra e Shtufit”. Fiks në vendin ku rreth dy vjet më parë pati rrëshqitje dherash dhe dëmtim të një pallati. Pas ndërhyrjeve për forcimin e kësaj zone me pilota betoni, me mbjelljen e pemëve ndihmojmë për të penguar erozionin. Sigurisht që ne e kemi detyrë funksionale të kujdesemi për gjelbërimin e qytetit në të cilin ju paguani taksa, por asnjëherë nuk është e tepërt nëse dhurojmë pemë apo bashkojmë forcat me punëtorët tanë në mbjelljet e reja. Kështu që unë sërish bëj thirrje për t’iu bashkuar kësaj pune të përbashkët dhe fantastike. Pemët janë jetë!. U bëfshin për zili këto fidanë të rinj në shtëpinë tonë të përbashkët, Gjirokastrën.Faleminderit nxënësve, drejtorit Vezir Mamo dhe Dragos.
