Policia e Shtetit arrestoi 32 persona dhe shpalli në kërkim 4 të tjerë, si pjesë të një grupi kriminal që pajisnin qytetarë me dokumente të falsifikuara dhe i kalonin në mënyrë të paligjshme në vendet europiane dhe jo vetëm.
Operacioni i Policisë filloi në orët e para të mëngjesit të djeshëm, për t’u finalizuar në orët e pasdites me arrestimin e një pjese prej tyre, sekuestrimin e laboratorëve dhe një shume të konsiderueshme parash. Operacioni i koduar “Rruga e gabuar” është në vazhdimësi të dy operacioneve të tjera të kryera nga Prokuroria për Krimet e Rënda, ndërsa në të kanë marrë pjesë edhe përfaqësues të organeve ligjzbatuese amerikane, të atashuara në ambasadën e SHBA-ve në Tiranë.
“Policia e Shtetit në bashkëpunim me Prokurorinë e Krimeve të Rënda Tiranë dhe organet e tjera ligjzbatuese në vend, si dhe me ndihmën e agjentëve të Sigurisë së Shërbimit Diplomatik të atashuar në Ambasadën Amerikane (DSS), finalizuan me sukses operacionin e koduar ‘Rruga e gabuar’. Gjatë këtij operacioni janë arrestuar 32 shtetas shqiptarë, mes tyre 1 punonjës policie, si dhe janë shpallur në kërkim 4 shtetas të tjerë. Nga të arrestuarit, 6 prej tyre me masë sigurie ‘Arrest shtëpie’, njoftoi Policia e Shtetit. Burime thonë se punonjësi i arrestuar i Policisë ka shfrytëzuar të dhënat nga puna e tij për të ndihmuar anëtarë të këtij grupi për të bërë të mundur trafikimin dhe falsifikimin e dokumenteve.
OPERACIONI
Rreth 250 forca policie kanë marrë pjesë në operacion, ndërsa janë zhvilluar një sërë kontrollesh në banesa të personave të vënë në pranga. Ndërkohë, kanë qenë hetimet e Prokurorisë për Krime të Rënda, e cila në bashkëpunim me Policinë e Shtetit dhe organet e tjera ligjzbatuese kanë bërë të mundur zhvillimin e operacionit në fjalë. Gjithashtu, bëhet e ditur se pjesë e këtij operacioni, ashtu si në dy operacionet e para, është zhvilluar me ndihmën e agjentëve të Sigurisë së Shërbimit Diplomatik, të atashuar në ambasadën amerikane (DSS), shkruan Panorama.
Në kuadër të këtij operacioni u zbuluan dhe sekuestruan 4 laboratorë në Shqipëri, që shërbenin për falsifikimin e dokumenteve, pajisje të ndryshme si, skaner, fotokopje, një sasi e madhe parash kesh, certifikata, karta identiteti, një numër i konsiderueshëm dokumentesh të personave si dhe një armë zjarri automatike, kjo e fundit e sekuestruar në banesën e një prej të arrestuarve.
Sipas Policisë, operacioni u zhvillua në bashkëpunim dhe me disa prej drejtorive të Policisë në vend. Ndërkohë, arrestimet janë kryer në 13 qytete të ndryshme të vendit. “Në operacion kanë marrë pjesë Drejtoritë Vendore të Policisë në Tiranë, Durrës, Elbasan, Korçë, Fier, Vlorë, Berat dhe Gjirokastër. Operacioni u zhvillua në disa qytete të vendit, në Sarandë, Delvinë, Gjirokastër, Tepelenë, Përmet, Vlorë, Fier, Berat, Lushnjë, Krujë, Elbasan, Tiranë dhe Korçë” shkruan Policia.
Personat e arrestuar nga Qarku Gjirokaster jane : R.H 43 vjec nga Gjirokastra, D.S 35 vjec nga Gjirokastra, L.M 61 vjec nga Permeti, I.M 59 vjec nga Gjirokastra, S.C 55 vjec nga Gjirokastra, C.T 48 vjec nga Gjirokastra, V.GJ 50 vjec nga Gjirokastra, E,B 28 vjec nga Tepelena (punonjes policie),
