Në fund të këtij viti pritet të merret një vendim për organizimin e shërbimit gjyqësor në vend. Aktualisht ka një propozim të hedhur nga ish-ministri i Drejtësisë, Ylli Manjani, i mbështetur nga studimi i organizatës “CEPEJ”, e cila është më e fuqishmja në hapësirën europiane përsa i përket çështjeve të organizimit të shërbimit gjyqësor.
Sipas këtij studimi, shërbimi gjyqësor në vend mund të organizohet në 12 Gjykata Fakti (Gjykata e Shkallës së Parë) në qytetet qendër qarku dhe 4 Gjykata Apeli në të gjithë vendin. Kështu qytete si Saranda dhe Përmeti nuk do të kishin më Gjykata. Gjithë puna për shkallën e parë do të përqëndrohej në Gjirokastër.
Kjo e fundit ndërkohë do të humbiste Gjykatën e Apelit, e cila është parashikuar të zhvendoset në Fier. Deri më tani s’ka asnjë qëndrim zyrtar nga Ministria e Drejtësisë. Pritet që ky institucion të shprehet në fund të muajit dhjetor.
©argjiroja.net
