Rama të premten në Gjirokastër ‘sjell’ edhe një lajm për Zamira Ramin


Na ndiqni në Facebook, Instagram dhe Youtube:
  • Facebook
  • Instagram
  • Youtube

Kryeministri Edi Rama do të jetë të premten dhe të shtunën në Gjirokastër për disa takime në rang qarku. Një ndër eventet e rëndësishme që është planifikuar të organizohet është ai nën logon ‘Bashkia që Duam’. Ky format i  ri është një tur paraelektoral i kryeministrit në prag të zgjedhjeve lokale.

Deri më tani Rama ka shkuar në dy bashki që i drejtojnë kryetarë të PS-së (Korçë dhe Vlorë), si dhe në një bashki që e drejton PD-ja (Lezhë). Ndërkohë Gjirokastra është një prej bashkive që e drejton LSI-ja. Shpesh herë ka pasur zëra se kryebashkiakja Zamira Rami mund të rikandidohet për një mandat të dytë si e propozuar nga PS.

Deri më tani s’ka asgjë zyrtare për këtë çështje, por takimi që Edi Rama do të zhvillojë të premten, le të themi që është ‘prova e madhe’. Nëse Zamira Rami do të jetë e pranishme në atë takim, natyrisht që kjo mbart një simbolikë të fortë dhe rrjedhimisht do të thotë rikonfirmim i saj për një mandat të dytë.

Por nëse Rama do e mbajë takimin ‘Bashkia që Duam’ pa Zamira Ramin, kjo është një shenjë e qartë se PS po e anashkalon dhe as që mund të mendohet se do ta rikandidojë nën logon e saj. Një takim i tillë pa të parën e qytetit, natyrisht që do të shndërrohet edhe në spektakël akuzash ndaj Zamira Ramit dhe administratës së saj. 

Vetë kryetarja e bashkisë nuk e ka fshehur dëshirën për një mandat të dytë. Takimi i së premtes me gjasë do të zbulojë jo vetëm qasjen e Edi Ramës ndaj Zamira Ramit si një alternativë për një mandat tjetër, por ndoshta edhe kandidatin potencial të PS për garën e qershorit 2019. Gjithmonë nëse zgjedhjet lokale do të mbahen në atë muaj. Djegia e mandateve nga opozita do të ndryshojë gjithçka në jetën politike të vendit.  

©agjirolajm.net