Kryeministri Edi Rama u takua sot me ministrin e Jashtëm Italian Luigi Di Maio në Romë. Gjatë takimit ata biseduan për bilancin e dëmve të tërmetit të 26 nëntorit, për të cilin Kryeministri Rama u shpreh se sipas llogaritjeve paraprake dëmet janë mbi një miliard euro.
“Raporti do të jetë gati për pak ditë, por deri tani është përllogaritur rreth një miliard [euro]” u shpreh kryeministri Rama gjatë përshëndetjes me Di Maion ndërsa ky i fundit përgjigjet se dëmi është i lartë por ka besim se do të gjendet një zgjidhje në Konferencën e Donatorëve:
“Një miliard?! Shumë. Por unë kam besim se në Konferencën e Donatorëve do ta gjejmë një zgjidhje.”
Gjatë ditës, Kryeministri Rama do të takohet dhe me homologun e tij Giuseppe Conte.
Dy çështjet kryesore që do të diskutohen në takimin mes Ramës dhe Contes janë konferenca e donatorëve për përballimin e dëmeve të tërmetit që do të zhvillohet në shkurt në Bruksel dhe vendimi që do të marrin shtetet e BE-së për hapjen ose jo të negociatave me Shqipërinë dhe Maqedoninë e Veriut.
