Në Prokurorinë e Gjirokastrës ka mbërritur dosja për çështjen e nënës së Kostandinos Kacifasit, ekstremistit grek që u vra nga forcat Renea vitin e kaluar. Tashmë Prokuroria e Gjirokastrës ka afat deri në 15 ditë për të marrë në pyetje nënën e Kacifasit. 67-vjecarja Vasilia Kacifas është nën hetim pas thirrjeve antishqiptare të bëra gjatë ceremonisë së 1 vjetorit të Kostandin Kacifs. Duke folur në greqisht, në prani të shumë njerëzve, një numër i madh i ardhur nga Greqia pikërisht për këtë rast, ajo ka bërë thirrje për vrasje, dhunë e luftë.
“Tradhtarët. Përse i ndaluan njerëzit të vijnë? Se janë tradhtarë. Thyejuni turinjtë, vrajini, shfarosini. Janë tradhtarë. Nuk ka qeveri këtu. Vorio Epiri është tokë greke, ne jemi grekë. Do luftojmë dhe asgjë nuk do na ndalë. Jam krenare për ty biri im”, ka thënë ajo.
Kaq ka mjaftuar që Antiterrori dhe Prokuroria e Gjirokastrës ta vënë nën hetim nënë e Kacifas. Ligjërisht mund të niset një hetim për thirrjet e saj. Ka nene në Kodin penal që i ndalojnë këto thirrje. Por ky hetim ndaj një nëne të dëshpëruar për humbjen e të birit, nuk ka moral. Vasilia Kacifas e ka zemrën copë sepse ka humbur djalin e saj. Çdo nënë do të ndihej po njësoj në vendin e saj.
Edhe pse i biri ishte një ekstremist dhe e kërkoi vetë fundin e tij, mos prisni që nëna tani të dalë dhe të duartrokasë vrasjen e tij. Asnjë nënë nuk e hedh poshtë fëmijën e vet. Në këtë kuptim hetimi ndaj saj është i tepërt dhe nuk i bën nder institucioneve shqiptare. Vasilia Kacifas duhet lënë e qetë në dhimbjen dhe dëshpërimin e saj për humbjen e të birit.
Thirrjet antishqiptare janë të dënueshme moralisht dhe të papranueshme, por s’ka vend për ta vënë atë nën hetim penal. Janë të tjerë persona që meritojnë të hetohen për nxitje të urrejtjes ndër etnike mes shqiptarëve dhe grekëve, nuk ngeli puna tek nëna e Kacifas. Prandaj dy prokurorët e mbetur të Gjirokastrës, kujt t’i bjerë shorti për çështjen, thjesht duhet të pushojnë hetimet dhe të mos merren me këtë histori. Asnjë rrezik s’i vjen Shqipërisë nga një e moshuar e dëshpëruar dhe e lënduar nga humbja e të birit.
©argjiroja.net
