Gjirokastra do të ketë një mjek më pak pas 30 qershorit dhe një tjetër kryetar bashkie me emrin Flamur. Gjithmonë nëse zgjedhësit do t’i besojnë votën Flamur Golemit, kandidatit të përzgjedhur nga Edi Rama për zgjedhjet lokale. Në Gjirokastër e thonë shpesh, herë me zili e herë me cinizëm; Flamur Golemi ka lindur me këmishë. Askush tjetër si ai nuk ka patur një ngjitje kaq të shpejtë në angazhimin politik. I ka buzëqeshur fati brenda 6 viteve ndoshta si askujt tjetër. Nga një mjek i zakonshëm në spitalin ‘Omer Nishani’, në vitin 2013 u emërua gjithashtu Drejtor i Shëndetit Publik.
Pas tre vitesh, mes hezitimeve për shkak të kulisave dhe përplasjes me Koço Kokëdhimën, Flamur Golemi merr drejtimin e PS-së në Gjirokastër në vitin 2016. Një vit më vonë zyrtarizohet i treti në listën e kandidatëve të PS-së dhe ia doli të zgjidhej deputet atëhere kur pak kush e mendonte. Përqëndroi fushatën kundër Vangjel Tavos, të cilit i referohej si ‘deputeti me numër telefoni’ dhe tentoi të rrëzonte mitin e rremë që ai kishte krijuar për vite me radhë në Gjirokastër. Vetëm seanca e së enjtes dhe mbledhjet në komisionin parlamentar e sillnin në Tiranë. Vijonte të jetonte në Gjirokastër dhe të ushtronte gjithashtu profesionin si mjek okulist. 43-vjeç, i martuar dhe babai i dy djemve, Flamur Golemi ka përfunduar studimet për mjekësi në Universitetin e Tiranës në vitin 2002.
Prej shtatorit 2002 nisi punë si mjek i përgjithshëm pranë Drejtorisë së Shëndetit Publik në Gjirokastër, ndërsa në maj 2008 filloi si mjek okulist në spitalin rajonal “Omer Nishani” dhe në klinikën “Athens Eye Hospital”. U regjistrua për studimet e ciklit të tretë në vitin 2012, por i ndërpreu më pas. Nëse do e kishte kryer edhe ai doktoraturën plagjaturë si Vangjel Tavo, Flamur Golemi do të ishte gjithashtu pjesë e ‘listës së zezë’ me politikanë e zyrtarë që kanë vjedhur punimet shkencore.
Zgjedhjet e 30 qershorit aq më tepër në kushtet kur opozita s’do të ketë kandidat, janë një sfidë e madhe për të. Historikisht Gjirokastra voton të majtas, kjo edhe për shkak të degradimit të PD-së, por edhe të një tradite të mbartur ndër vite. Gjasat janë që fitorja e Gjirokastrës të jetë çështje e mbyllur. Por nuk është kjo ajo që u intereson qytetarëve. Sfida e Flamur Golemit, nesë do të fitojë zgjedhjet, fillon pas 30 qershorit. Si do ta menaxhojë më mirë bashkinë; si do të shndërrojë Gjirokastrën në një destinacion fundjavash njësoj si Korça le të themi; çfarë perspektive tjetër do të krijohet në këtë qytet dhe çfarë vëmendje të shtuar do të kenë zonat rurale.
Kjo është ‘lufta’ e vërtetë që ka Flamur Golemi. Zgjedhjet janë vetëm një ‘betejë’. Nëse ai do të adresojë si duhet për zgjidhje problemet me të cilat përballet sot Gjirokastra, atëherë mund të themi se ia ka vlejtur një mjek më pak në sistemin tonë shëndetësor sepse i dhamë qytetit një menaxher të zotin. Gjirokastra nuk ka nevojë thjesht për një kryebashkiak tjetër, as për një Flamur tjetër. Gjirokastra duhet të ketë mbi kokë një menaxher të mirë sepse ky qytet nuk është vetëm i joni, është pasuri e të gjithë botës. Nëse zgjidhet kryebashkiak, Flamur Golemi duhet të çojë Gjirokastrën drejt një perspektive tjetër, jo thjesht të bëjë diferencën me dy kryebashkiakët e fundit; Flamur Bimen e Zamira Ramin.
©argjiroja.net
