Emri i Hasan Likës do të mbetet përgjithmonë në historinë e futbollit gjirokastrit si ai i trajnerit i cili udhëhoqi një grup lojtarësh drejt kualifikimit të parë në Ligën e Europës të skuadrës së Luftëtarit. Por me sa duket kjo arritje historike nuk mjafton që t’i garantojë teknikut drejtimin e skuadrës në arenën ndërkombëtare e vazhdimësinë e projektit edhe në vitin e ardhshëm. 

Përkundrejt asaj që mund të mendohet, klubi duket se nuk ka ndër mend të konfirmojë teknikun në stolin e skuadrës dhe ka filluar që tani kërkimin e një trajneri të ri. Mësohet se tashmë nuk bëhet fjalë vetëm për hipoteza, por për bisedime konkrete me emra të tjerë.

Klubi gjirokastrit mbetet i orientuar nga trajnerët e huaj dhe kandidati më i mundshëm për të drejtuar gjirokastritët është i tillë gjithashtu. Sipas informacioneve që qarkullojnë në mdia, bëhet fjalë për sllovenin Milosh Kostiç, i cili në të kaluarën ka drejtuar përfaqësueset e Sllovenisë, si dhe klube si Lierse, në Belgjikë, Zheljeznicar në Bosnje dhe Iraklis në Greqi.

Trajneri 47-vjeçar, i cili në muajt e fundit ka drejtuar ekipin e të rinjve të Olimpija Ljubjanës në Slloveni, është në kontakte me klubin gjirokastrit dhe brenda pak ditësh pritet një përgjigje përfundimtare, meqë në javët e fundit ai ka marrë oferta edhe nga Apollon Smyrni.