Moti po tregon kapriçiot e tij në maj jo vetëm në Shqipëri, por edhe në mbarë Europën. Në disa vende, si në Gjermani janë regjistruar edhe reshje dëbore. Por dëbora do të shfaqet edhe në Shqipëri në male.
Sipas A2 CNN, shirat e rënë gjatë natës kanë shënuar deri 45 mm në zonat e Ultësirës Perëndimore ku kanë shkaktuar edhe përmbytje lokale, ndërsa parashikohet që moti të mbetet i vranët me shira të dobët deri vonë në mbrëmje, kur reshjet bëhen mesatare deri intensivë në disa zona të vendit, por kryesisht në ato Qendrore.
Edhe e hëna ruan një tablo të ngjashme sinoptike, ku shira të dobët mbeten prezente në pjesën më të madhe të vendit, ndërsa herë pas here do të ketë edhe rrebeshe të shkurtra.
Temperaturat kanë qëndruar të larta gjatë fundjavës, ku vlerat minimale dhe maksimale janë luhatur nga 5 në 24°C, por një rënie të ndjeshme sjellin orët e para të së hënës. Në zonat kufitare Veriore do rishfaqet dëbora në majat e maleve. Java që vjen sjell mot kryesisht të kthjellët, por më të freskët.