Alban Zeneli është kandidati i radhës nga lista e PD që ka pranuar mandatin e deputetit. Ai është është në listën e PD për Qarkun e Kukësit, ndërsa ka dorëzuar formularin e dekriminalizimit në KQZ duke shprehur vullnetin për të pranuar mandatin e deputetit.
Alban Zeneli renditet tek ata kandidat që kanë ndryshuar mendje, pasi ai ka firmosur lënien e mandatit në bllok. Madje në protestën e 5 Marsit, Alban Zeneli ka marrë fjalën e ka fjalën dhe e ka ‘djegur’ publikisht mandatin.
“Edi Rama qarkut të Kukësit i solli vetëm mjerim, varfëri dhe emigrim. Mandati nuk është i yni por i qytetarëve të Kukësit, Tropojës, Hasit, qytetarëve që votuan PD”, – pati thënë Zeneli në protestën para Parlamentit.
Ndërkohë që Komisioni Qendror i Zgjedhjeve ka parashikuar të bëjë sot zëvendësimin e 6 mandateve të tjera të lëna nga deputetët e PD dhe LSI-së. KQZ ka lajmëruar mbajtjen e mbledhjes së radhës sot ku ndër të tjera është edhe plotësimi i 6 vakancave të krijuara si rrjedhojë e dorëzimit të mandateve të deputetëve nga deputetët e PD dhe LSI.
Në rendin e ditës të mbledhjes KQZ ka parashikuar dhënien e mandatit të deputetit Astrit Veliajt, kandidatit të listës shumëemërore të Partisë Demokratike, Qarku Berat, Lefter Maliqi.
Ndërsa vendin e lënë bosh nga Viktor Tushaj i LSI-së në Lezhë do ta zërë Elda Hoti. Sakaq, Nora Malajn, e zgjedhur deputete në Durrës nën siglën e LSI, e zëvendëson Edlira Hyseni.
Mandatin e Vangjel Tavos po nga LSI në Gjirokastër, KQZ do t’ia japë Ediola Brahës. Ndërsa vendet e dy demokratëve Gent Strazimiri dhe Klevis Balliu në Tiranë dhe Korçë do t’i zënë në Kuvend respektivisht Ajlinda Halilaj dhe Ligoraq Karamelo.
6 deputetët e rinj do të betohen seancën e ardhshme parlamentare. Ata e çojnë në 10 numrin parlamentarëve të zëvendësuar. Pas betimit edhe të këtyre 6 deputetëve, Parlamenti shkon në kuotën e 92 deputetëve. Nëse votat e tyre ata do t’i bashkojnë me ato të mazhorancës, kjo do të thotë miratim edhe i atyre projektligjeve që kërkojnë 84 vota.
Në rendin e ditës po ashtu KQZ do të diskutojë edhe kërkesat e 4 partive të cilat do të garojnë për zgjedhjet lokale të 30 qershorit.
