Një ditë më parë argjiroja.net raportoi lajmin se kryebashkiakja e Gjirokastrës, Zamira Rami, është kallëzuar në Prokurori për veprën penale ‘shpërdorim detyre’, lidhur me disa shpronësime gjatë punimeve restauruese në ‘Kodrën e Rilindasve’. Dosja e organit të akuzës ka shkuar në Gjykatën e Shkallës së Parë, e cila do të zhvillojë seancën e parë për këtë çështje më datë 25 korrik.
Gjyqtari që i ka rënë shorti është Pëllumb Vehbiu. Por nëse kthehemi katër vjet më parë, kujtojmë se po njësoj si Zamira Rami, për ‘shpërdorim detyre’ ishte kallëzuar edhe Flamur Bime. Në shkurt 2015, Inspektoriati Kombëtar i Mbrojtjes së Territorit, e çoi Bimen në Prokurori për çështjen e ndërtimit të një pallati 12 katësh në qendër të lagjes ’18 Shtatori’.
Asokohe IKMT kallëzoi po ashtu për ‘shpërdorim detyre’ edhe Kryeinspektorin dhe inspektorët e IKMT të Bashkisë Gjirokastër, Ilir Çumaku e Antoneta Çako. Nëse në rastin e Flamur Bimes ky kallëzim kishte gjithashtu edhe sfond politik për ta eleminuar nga ambicja e tij për një mandat të katërt dhe për ta vënë nën presion që të mbështeste kandidaturën e Zamira Ramit, për kryebashkiaken aktuale situata është krejt ndryshe.
Kemi akuzë të njëjtë si në rastin e Bimes, por kallëzim tjetër për tjetër. Bimen e kallëzoi IKMT me porosi politike, ndërsa Zamira Ramin e kanë kallëzuar banorë që nuk janë shpronësuar. E përbashkëta e tyre është thjesht se dy kryebashkiakët e fundit të Gjirokastrës, Bime në 2015 dhe Zamira Rami në 2019, lënë zyrat për t’u përballur me akuzën ‘shpërdorim detyre’. Ata mund të ‘bashkohen’ edhe më tej nese Zamira Rami do të dalë pa ndëshkim nga akuza që i është ngritur. Gjykata vendosi për dosjen e Flamur Bimes. Gjykata do të vendosë edhe për dosjen e Zamira Ramit.
©argjiroja.net
