Shpëtim Moçka kërkon vetëm tri pikë në Gjirokastër dhe me deklaratën e fundit, kapiteni i Flamurtarit paralajmëron kthesën. Në një intervistë për “Panorama Sport”, Moçka shprehet se të dyja ekipet janë të barabarta, pasi janë ndërtuar me vonesë.

Portieri vlonjat shikon si pikë të fortë të rinjtë e Luftëtarit, por shpreh bindjen se kundërshtari do të kalohet lehtësisht. Kapiteni mendon se nuk ka vend më për justifikime nga ana e skuadrës vlonjate, por duhet të mendohet për fitore.

Moçka, sa ka ndikuar ndërprerja e kampionatit për Flamurtarin?

Pushimi ka ndikuar në favorin tonë. Siç dihet, ekipi është ndërtuar më me vonesë se ekipet e tjera. Mendoj se pas pushimit dyjavor, ekipi do të jetë në gjendje më të mirë fizike. Djemtë janë më të gatshëm dhe në formë. Besoj se do t’ia dalim me sukses.

Si po përshtaten lojtarët në këtë ekip të ri?

Janë duke u përshtatur ditaditës. Normalisht që futbolli do kohën e vet dhe nuk është me buton që të vijnë gjërat direkt. Do pak kohë sa të ambientohen lojtarët e rinj dhe ata me eksperiencë. Kjo do të sjellë më pas edhe ardhjen e rezultateve. Kam besim se ndeshjen me Luftëtarin do ta kalojmë.

Do të ishit i kënaqur edhe me barazimin në ndeshjen me Luftëtarin apo vetëm me tri pikët?

Mendoj se nuk duhet të kënaqemi me barazimin. Në Gjirokastër duhet që të shkojmë për të marrë tri pikët. Ky duhet të jetë synimi ynë.

Si e shikoni Luftëtarin e këtij sezoni, me trajner të ri dhe lojtarë të rinj dhe sa ndikojnë problemet te ky kundërshtar?

Normalisht që edhe Luftëtari është si Flamurtari, pasi në pjesën më të madhe të ekipit ka lojtarë të rinj. Futbollistët e sezonit të shkuar janë larguar dhe të rinjtë duan kohën e vet që të përshtaten. Megjithatë, ne e vlerësojmë kundërshtarin. Kam besim te djemtë që ne do t’ia dalim në këtë takim, pasi Flamurtari ka në përbërje lojtarë cilësorë. Ne e vlerësojmë kundërshtarin, por nuk kemi aspak frikë nga ata. As i nënvlerësojmë, por as nuk do t’i mbivlerësojmë.

Nuk ka ndonjë element të cilit i druheni te kundërshtari?

Jo, nuk ka ndonjë individ të veçantë, por unë them se duhet që t’u druhemi pak djemve të rinj, pasi, me sa kam parë në ndeshjet e kaluara, janë futbollistë që vrapojnë dhe kanë dëshirë. Gjithsesi, mendoj se ne do t’ia dalim.

Çfarë nuk ka shkuar në tri ndeshjet që keni lënë pas?

Unë mendoj se lojtarët kanë nevojë për kohë, pasi ne e filluam pak me vonesë stërvitjen këtë sezon. Tani besoj se nuk ka më justifikime, pasi bëhet një muaj që ekipi është mbledhur. Duhet të rikthehemi te rezultatet pozitive.

Si është atmosfera dhe situata në ekip pas këtyre rezultateve dhe para Luftëtarit?

Normal që rezultatet nuk kanë qenë të mira, pasi tri humbje në po kaq ndeshje nuk janë fort mirë. Djemtë janë mobilizuar që të kthejnë faqen tjetër dhe të arrijmë te rezultatet pozitive. Grupi është më i bashkuar.