Rruga që lidh fshatin Radat me Pëshkëpinë e Sipërme duket se do të jetë investimi i parë që Dhimitraq Toli do të inagurojë si kryebashiaku i ri i Dropullit. Prej pak ditësh kanë nisur punimet në këtë segment të rëndësishëm për banorët e këtyre fshatrave.
Financimi për këtë projekt është gjetur nga programi evropian IPA CBA, Greqi-Shqipëri, në bashkëpunim me Bashkinë ‘Jeorgjios Karaiskaqis’. Investimi kap vlerën e rreth 240 mijë eurove, prej të cilave 15% financohen nga Bashkia Dropull.
Për të parë nga afër punimet në kantier ishte edhe kryebashkiaku Dhimitraq Toli. Ky segment rrugor zgjidh përfundimisht problemin e banorëve të këtyre fshatrave të largët për të komunikuar me pjesën tjetër të Bashkisë Dropull.
Por nga ana tjetër rikonstruksioni i rrugës krijon një perspektivë të re për zhvillimin e turizmit në këtë zonë, e cila ka pasuri të shumta kulturore e natyrore. Përmendim këtu kishën e njohur të Shën Mërisë. Punimet për rrugën e re përfundojnë pas disa muajsh.
©argjirolajm.net
