Policia e Gjirokastrës njoftoi mëngjesin e sotëm se kishte arrestuar një të ri nga Memaliaj, i cili po transportonte 6 klandestinë drejt Shkodrës. Më shumë se ky njoftim i zakonshëm që shpërndan policia, lajmi i vërtetë në fakt këtu është gjetkë. Në media dolën pamje të klandestinëve të shtrirë në oborrin e komisariatit të Gjirokastrës.
Video e publikuar nga Report Tv nuk i bën nder policisë dhe as shtetit tonë. Këta njerëz që udhëtojnë me ditë të tëra nga vendi i tyre për ta përdorur Shqipërinë si tranzit, meritojnë një trajtim më dinjitoz. Së paku një qendër ku ata të qëndronin në kushte normale, të merrnin ushqim të shpejtë dhe një trajtim mjekësor nëse do të kishin nevojë derisa të kryeheshin procedurat e deportimit.
T’i lesh të shtrirë përtokë mes temperaturave të larta, për ne është një turp i përbashkët. Kush më mirë sesa ne shqiptarët e kupton emigrimin. Kemi rreth 30 vite që vazhdojmë emigrojmë. Atë trajtim që nuk e meritonim sa herë zbarkonim në token greke, në Itali, në Francë, Gjermani apo gjetkë, natyrisht që nuk e meritojnë as klandestinët që shkelin tek ne për pak kohë.
I konsiderojmë si jo njerëzore kushtet ku rrinë shpesh azilantët shqiptarë nëpër Europë edhe sot e kësaj dite. Shumë mirë bëjmë. Por nga ana tjetër i trajtojmë ata që vijnë në tokën tonë në mënyrën më të keqe të mundshme, ashtu sic nuk do donim të na trajtonin ne shqiptarëve nëpër Europë. Mbase ky në Gjirokastër është një rast i izoluar, por pa më të voglin dyshim që na turpëron të gjithëve se bashku dhe nuk duhet përsëritur më kurrë.
©argjirolajm.net
