Kryebashkiakja e Gjirokastrës, Zamira Rami, është kallëzuar në Prokurori për ‘Shpërdorim Detyre’. Burime të argjirolajm.net thonë se dosja me hetimet e Prokurorisë është dorëzuar në Gjykatën e Shkallës së Parë Gjirokastër para disa ditësh. Ndërkohë që seanca e parë gjyqësore është caktuar të mbahet më 25 korrik, ora 13:00.
Nuk dihet nëse do të jetë apo jo kryebashkiakja në detyrë në sallën e gjyqit apo do të përfaqësohet me avokatin e saj. Por çfarë ka ndodhur konkretisht, përse Zamira Rami është në bankën e të akuzuarve? Për momentin ka pak informacion mbi dosjen e plotë. Burime pranë grupit hetimor të kësaj çështje, i thanë argjirolajm.net se bëhet fjalë për shkelje ligjore në rastet e shpronësimeve.
Bashkia Gjirokastër i ka lejuar vetës të kryejë punime në vepra publike, pa shpronësuar më parë pronarët e tokës. Argjirolajm.net do të sjellë në ditët e ardhshme më tepër detaje rreth kësaj dosje, e cila përflitej prej kohësh në Gjirokastër.
Prokurorët që e kanë hetuar, fillimisht hezituan për ta dërguar dosjen në Gjykatë përpara zgjedhjeve, nga frika se mos kjo do të interepretohej si një lëvizje me sfond politik për shkak të pozicionit të kryebashkiakes. Prandaj u prit qëllimisht përfundimi i zgjedhjeve edhe pse hetimet ishin mbyllur kohë më parë. Ndoshta një prej arsyeve që Zamira Rami ka qëndruar shumë pasive gjithë këto kohë, para dhe gjatë fushatës, lidhet edhe me ekzistencën e kësaj dosje.
Natyrisht që s’jemi duke thënë se ajo ka faj apo meriton të ndëshkohet. Kjo i takon Gjykatës dhe ne s’mund të aludojmë për asgjë. Por akuza që i është bërë është e rëndë. Kryebashkiakja akuzohet për ‘shpërdorim detyre’, vepër penale e cila dënohet me burgim deri në 7 vjet apo dhe me gjobë nga treqind mijë deri në një milion lekë. Shorti ka caktuar Pullumb Vehbiun si gjyqtar për këtë dosje. Të presim seancën e parë pas 10 ditësh për të mësuar më tepër.
©argjirolajm.net
