Pas ndeshjes, trajneri i Luftëtarit, Julian Ahmataj, u shpreh se barazimi ishte rezultat i drejtë. Ai theksoi se të dyja skuadrat vepruan me shumë kujdes për të mos pësuar, ndërsa rastin e penalltisë ai nuk deshi ta komentonte:
“Tirana kishte bërë mirë me mënyrën e lojës, na bllokoi manovrën tonë sulmuese. Edhe ne u munduam ta bënim këtë gjë, ishte një ndeshje e kujdesshme dhe çdo gjë do të zgjidhej nga tranzicionet. Të dyja skuadrat u sollën me shumë kujdes në këtë ndeshje. Rasti i penalltisë? Nuk e komentoj rastin, sepse e kam vendosur se nuk do të komenton arbitrat në asnjë moment.
Të gjitha skuadrat, kur u mungojnë lojtarët kryesorë, e ndiejnë. Kemi bërë një modifikim, kemi tërhequr Aleksin për të bërë kontrollorin, por humbëm përpara. Kur Aleksi u spostua përpara, ishim më të rrezikshëm. Lojtarët kanë specifikat e tyre dhe mungesa e një lojtari si Dunga ndihet në skuadër, sepse na ndihmon shumë.
Kemi shënuar thuajse në çdo ndeshje dhe shpërndarja e golave ka qenë e mirë, kanë shënuar shumë lojtarë dhe nuk kemi varësi nga Dunga. Oshafi bëri një punë të madhe dhe në të ardhmen do të bëjë më mirë dhe do ta ndihmojë skuadrën.
Rivalët tanë, Tirana dhe Kastrioti, kanë skuadër të mirë, por ne duhet të merremi vetëm me veten tonë, sepse futbolli është kapriçoz dhe duhet të jemi të përgatitur sa më mirë për çdo ndeshje. Futbollistët kanë bërë mirë gjithçka, duke sakrifikuar nga jeta e tyre e përditshme. Te Luftëtari, ndryshe nga Kamza vitin e kaluar, kam gjetur një skuadër më inteligjente dhe e kam kapur gjithçka në shumë pak kohë”, tha për “Supersport” trajneri Ahmataj.
