Për PDIU ajo që ndodhi një ditë më parë në Bularat të Gjirokastrës, ku një ekstremist grek mbeti i vrarë është alarm për institucionet e sigurisë kombëtare.
Ai tha se kundërshtimi i ngritjes së varrezave greke është bërë pikërisht për të parandaluar ngjarje të tilla.
Në një dalje për mediat, kreu i kësaj partie Shpëthim Idrizi tha se në 25 tetor policia ndaloi në Kakavijë dy anëtarë të bandës së Vorio Epirit dhe më pas u lanë të lirë me ndërhyrjen e konsullit grek.
Idrizi: Për shumë arsye, por dhe që të parandaloheshin ngjarje të tilla, Ne e kemi kundërshtuar ngritjen e Varrezve të Ushtarëve Grekë, që erdhën si pushtues në territorin e Shqipërisë. Ngritja e këtyre varrezave dhe dhënia e Statusit të Varrezave Historike dhe shndërrimi i tyre në vend pelegrinazhi çdo vit kanë gjallëruar qarqet ekstremiste Greke të Vorio-Epirit, si në rastin e djeshëm, por dhe të patriotëve shqiptarë, të cilëve u hiqet e drejta e protestës dhe ndalohen nga policia.
Festa e Greqisë mund të festohet në Greqi, e jo me ekstremistë të importuar në varre imagjinare ushtarësh pushtues grekë dhe që lëvizin të lirë, duke rrezikuar integritetin tonë.
Ky është rasti për të ngritur alarmin për institucionet e sigurisë kombëtare, SHISH, prokurorinë etj sepse si është e mundur që persona të tillë që në profilet e tyre e tregojnë haptas që janë ushtarë të Vorio Epirit, nuk ndalohen.
Unë sot dua të bëj dy pyetje për ministrinë e Brendshme dhe SHISH.
A janë ndaluar më 25 tetor nga policia e shtetit në pikën e Kakavijës anëtarët e Bandës së Vorio Epirit, shtetasit grek Mondis Kokalios dhe Theodhoros Asvestopulos përreth 4 orë, a janë ndaluar më pas këta shtetas me ndërhyrjen e konsullit grek të Gjirokastrës.
PDIU i bën thirrje ministrisë së Jashtëm të kërkojë urgjentisht nga autoritetet greke shpjegime për ngjarjen e djeshme. Veprimtarinë e organizatave terroriste të Vorio Epirit në Greqi, sic e pamë edhe dje në aktivitetin e dhunshëm përpara ambasadës shqiptare në Athinë, ku protestohej me flamur të Vorio Epirit.
Ministria e Jonë e Jashtme duhet të kërkojë shpjegime urgjent nga shteti grek dhe për financimet sekrete të ministrisë së Jashtme, standard që nuk ekziston në diplomacitë perëndimore. PDIU do të kërkojë zyretarisht që prokuroria të hapë hetimet për fondet sekrete greke për të cilën ne po bëjmë gati denoncimin tonë.
