Kastrioti arriti të befasonte Luftëtarin duke e mundur në Gjirokastër me rezultatin 0-1. Për këtë takim, i kënaqur është shprehur trajneri shkodran Elvis Plori i cili thotë se skuadra e tij ende nuk është gati për kampionatin, ndërkohë që mbijetesa është një mision tepër i vështirë.
“Nuk jemi gati por jemi modestë. Kundërshtari nuk na njihte mirë ndërsa ne e njihnim. Erdhëm për të marrë një pikë por ashtu si po shkonte loja filluam të kërkonim 3 pikët dhe i morëm. Ne vijmë nga Kategoria e Parë dhe nuk jemi skuadër që kërkojmë titullin dhe gjithkush në këtë pozicion, do të ishte i kënaqur, por kemi një rrugë të gjatë për të bërë.
Në pjesën e parë kisha frikë dhe doja ta mbyllnim barazim. Menjëherë pas mbarimit të pjesës së parë, vendosa të bëja ndryshime duke qenë se mbrojtja kundërshtare u shthur dhe kërkuam të sulmojmë për 3 pikët.
Merkato? Këto janë mundësitë për të blerë tani dhe unë kam biseduar me stafin dhe kërkojë 2 lojtarë të tjerë që të kem mundësi për të bërë ndryshime gjatë sezonit.
Tifozat ishin me të vërtetë mbresëlënës me ato duartrokitje që na dhanë.
Objektiv është qëndrimi në Superiore por do të jetë shumë e vështirë pasi është kampionati i gjatë. Duhet të këmbëngulim dhe të jemi me këmbë në tokë. Dua të krijoj një grup që të shihet në fushë si një familje.
Rahim? Është lojtar që e kam marrë që në fillim dhe e kam ndjekur. Ka element teknik dhe ambientohet shpejtë. Bën 3 role para dhe më ka pëlqyer shumë sot edhe me detyrat si mbrojtës”, u shpreh Plori.