Në postimet tona për terrorin e sotëm në fshatin Bularat të Dropullit, janë me dhjetra komente raciste, me gjuhë urrejtje dhe sharje nga më të ndryshmet. Komente nga ne shqiptarët dhe fqinjët tanë grekë matanë dhe këtej kufirit. Jo pa qëllim i kemi lenë aty të gjitha si dëshmi e asaj që nuk duhet të jenë dy popuj fqinj me njëri-tjetrin. Është një gënjeshtër e madhe ajo që thonë mediat greke se Kostandinos Kaçifas u vra nga policia sepse donte të çonte flamurin e kombit të tij. Ne që jetojmë këtu e dimë se askush nuk të pengon në Dropull të çosh flamurin grek. Natyrisht që ky nuk është tolerim që ne shqiptarët i bëjmë minoritetit, por është një e drejtë e tyre.

Ata janë shtetas shqiptarë me kombësi greke që kanë gjithë të drejtën të jetojnë me simbolet e tyre kombëtare, por edhe të respektojnë ligjet e shtetit ku jetojnë. 35-vjeçari nuk u vra nga RENEA si minoritar, por u ekzekutua si një ekstremist që shëtiste me armë në fshat duke rrezikuar jetën e banorëve dhe hapi zjarr ndaj patrullës së policisë. Kostandinos Kaçifas mori atë përgjigje nga shteti si një person në marrëzinë e vet nacionaliste, jo sepse ishte grek apo se e ndaluan të çonte flamurin e kombit të tij të fshat. Festat e Greqisë janë përkujtuar dhe festuar në çdo rast në Dropull, s’ka patur kurrë incidente të kësaj natyre dhe kurrë s’ka ngritur njeri pretendimin se është ndaluar të çojë flamurin.

Bashkëjetesa mes shqiptarëve dhe minoritetit në Dropull, Gjirokastër dhe mbarë Shqipërinë është një vlerë e madhe që s’e zhbëjnë dot akte të tilla ekstremiste nga njerëz të indoktrinuar si Kostandinos Kaçifas dhe as komentet raciste në rrjetet sociale. Komente këtu në faqen tonë, ku si rrallë ndonjëherë brenda disa orësh një video nga ngjarja shkoi në mbi 45 mijë shikime, por dhe komente në forume të tjera online. Mendoni për një çast se kjo ngjarje mund të përfundonte edhe me më shumë viktima nëse s’do ishte ndalur marrëzia e 35-vjeçarit.

Policia e Shtetit bëri detyrën, ashtu siç e ka bërë dhe duhet ta bëjë policia greke ndaj çdo shqiptari haluçinantë si Kostandinos Kaçifas. Ngushëllimet i shkojnë familjes së tij që mbase s’ka qenë në dijeni të kësaj marrëzie nacionaliste të njeriut të tyre. Gjithë ne të tjerët duhet të dënojmë ngjarjen që mbjell pasiguri dhe nxit urrejtjen mes dy popujve, të cilët kanë më shumë gjëra që i bashkojnë sesa gjëra që i ndajnë. Kostandinos Kaçifas mori atë që meritonte për marrëzinë e tij. Zoti e mëshiroftë! 

© Libohova Online