Vijon përplasja mes kreut të shtetit Ilir Meta dhe qeverisë ‘Rama’. Sot Presidenti ka dalë sërish në një konferencë për mediat, prej nga ku bëri me dije se brenda ditës së hënë do të kallëzojë penalisht në Prokurorinë e Posaçme (SPAK) ministren e Drejtësisë, Etilda Gjonaj. Vec kësaj ai i ka kërkuar ministres që të japë sa më parë dorëheqjen dhe të përballet me drejtësinë. Meta e akuzon Etilda Gjonajn për disa vepra penale, si shpërdorim detyre, falsifikim dhe ndërhyrje të paligjshme në procesin e përzgjedhjes së anëtarëve të Këshillit të Emërimeve në Drejtësi
“Të gjithë qytetarët shqiptarë dhe partneritetet ndërkombëtare u njohën dje me veprat penale të shpërdorimit të detyrës dhe falsifikimit flagrant të kryera nga institucionit të ministrit të Drejtësisë, lidhur me KED. Provat do ia dorëzojmë SPAK, ku rezulton se është përfshirë drejtpërdrejtë Etilda Gjonaj, por dhe funksionarë të lartë të këtij institucioni, në varësi të saj, në llogari të skenarit mafioz të kapjes së Gjykatës Kushtetuese. Gjonaj ka urdhëruar Sekretarin e Përgjithshëm të dërgonte për botim në Fletoren Zyrtare një vendim, që duhet botuar vetëm në faqen e Gjykatës Kushtetuese.
Ministrja nuk ka asnjë rol të dërgojë aktet e KED për botim. Ka urdhëruar botimin pa ia kërkuar askush. Ministrja ka akuzohet për shpërdorim të detyrës, falsifikim dhe ndërhyrje e paligjshme në proces. Brenda ditës së hënë do depozitoj pranë SPAK kallëzimin penal ndaj ministres Etilda Gjonaj dhe jo vetëm. Duke qenë se Etilda Gjonaj e ka humbur tërësisht besimin e Presidentit të Republikës, të shprehet me dekret për emërimin e saj, do të mirëprisja dorëheqjen e saj dhe përballjen e saj me drejtësinë. Si një ish-ministre do doja që ajo të hetohej e lire”, tha Meta.
Ky është kallëzimi i dytë penal që kreu i shtetit bën në SPAK lidhur me cështjen e radhës së plotësimit të vakancave në Gjykatën Kushtetuese. Javë më parë Meta kallëzoi edhe kreun e KED, Ardian Dvorani. Presidenti akuzon mazhorancën dhe zgjatimet e saj e në institucionet e reja të drejtësisë për kapje të sistemit.
Ndërkohë Meta ka paralajmëruar një tubim para Kuvendit më 2 mars, që përkon edhe me Besëlidhjen e Lezhës. Ai ka thënë se do të nxjerrë një dekret që do t’i japë fund atij që ai e quan grusht shtetit të mazhorancës. Nuk dihet ende me saktësi lëvizja e tij, por gjasat janë që Meta të dekretojë shpërndarjen e parlamentit, atij që ai e quan parlament me ‘dele deputetë’.
Edhe nëse kjo ndodh, gjasat janë që të mos kemi realisht shpërndarje të parlamentit, është një lëvizje që nuk do të prodhojë asgjë pasi mazhornaca nuk do ta njohë dekretin, ashtu sic nuk njohu dekretin për zgjedhjet lokale. Ceshtja do t’i kalojë Gjykatës Kushtetuese, e cila nuk ka kuorumin e nevojshëm për të marrë vendime. Jemi brenda një rrethi vicioz nga i cili nuk dihet se si do të dilet. Mungesa e Gjykatës Kushtetuese e ka sjellë të gjithë këtë anarshi juridike dhe përplasje mes institucioneve.
