Mbyllja e kompanive të basteve është një temë e nxehtë që po diskutohet shumë këtyre ditë. Jo vetëm për çfarë do të ndodhë më pas, por edhe për faktin që do të mbeten të papunë mijëra shqiptarë.
Nga të dhënat që i referohen një studimi të Universitetit të Tiranës në vitin 2016, rezulton se me mbylljen e basteve nga janari e tutje 7900 vetë do të mbeten të papunë. Sa i përket Gjirokastrës, ArgjiroLajm.net mëson se janë rreth 60 pika bastesh që do të mbyllen, me plus-minus 5 persona të punësuar. Pra, me një përllogaritje të përafërt rreth 300 vetë do të jenë të papunë.
Ministri i Financave, Arben Ahmetaj deklaroi në Kuvend se po përgatitet “një program rikualifikimi për të gjithë ata që do të dalin të papunë” nga mbyllja e kazinove dhe pikave të basteve.
“Po përgatisim një program rikualifikimi për të gjithë ata që do të dalin të papunë nga shërbimet e kësaj industrie. Shërbimi Kombëtar i Punës ka nisur punën për hartimin e një programi specifik për një rikualifikim të detyrueshëm. Është iniciativë për t’u përshëndetur dhe mbështetur”, u shpreh Ahmetaj.
Megjithatë pavarësisht atyre që mbeten të papunë, përfitimet e shqiptarëve nga mbyllja e basteve dhe e kazinove, do të jenë shumë herë më të mëdha.
©ArgjiroLajm.net
