Dimitris Kotsionis ka qenë një nga protagonistët e pjesës së dytë të sezonti të kaluar me skuadrën e Luftëtarit. Mbrojtësi grek tregoi mjaft cilësi të mira gjatë periudhës së tij të qëndrimit në Shqipëri, por me mbylljen e sezonit, ashtu si edhe të gjithë futbollistët e tjerë të luftëtarit, ai i dha lamtumirën Gjirokastrës ku nuk ishte paguar rregullisht.
Futbollisti u kthye në Greqi, ku vendosi t’i bashkohej përsëri ekipit të Panaçaiki, me të cilin kishte luajtur edhe në pjesën e parë të sezonit të kaluar. Ai udhëtoi drejt Holandës për t’u bashkuar në fazën përgatitore dhe sot u bë zyrtarisht pjesë e tij me firmën në kontratë.
Por në mënyrë të papritur, Kotsionis dhe një shqiptar i paidentifikuar, janë bërë pjesë e akuzave që ka lëshuar presidenti i AEL Larisës, Aleksis Kugias, i cili më përpara ka qenë president i Panaçaiki. Kugias, nëpërmjet postimeve në faqen zyrtare të AEL Larisës, akuzoi klubin se po manipulonte miqësoret në Holandë e Belgjikë dhe se protagonistë kishin qenë tre persona, ku njëri ishte shqiptar që i fillonte mbiemri me shkronjën X.
Në një postim të dytë, ai bëri të ditur se çështja do u shkonte organeve më të larta në UEFA dhe në FIFA, sepse ishte e pamundur të vazhdohej kështu. “Është bërë mashtrim me bastet sportive, në një ndeshje u deklarua se do të testoheshin dy lojtarë të rinj serbë, por në fakt u aktivizua Kotsionis që vinte nga Shqipëria”, shkruante presidenti i AEL Larisa, i cili është një prej avokatëve më të njohur në Greqi.