Pas Libohovës edhe Këshilli Bashkiak i Gjirokastrës zhvilloi sot mbledhjen e radhës në një formë tjetër që nuk e kishim parë deri më sot. Këshilltarët u mblodhën online përmes një platforme të vecantë, për të diskutuar mbi situatën emergjente të krijuar nga Covid-19 dhe masat e ndërmarra nga Bashkia.
Gjatë mbledhjes kryebashkiaku Flamur Golemi ndau me këshilltarët punën e bërë deri më tani në drejtim të dezinfektimit të rrugëve dhe ambienteve të tjerëve, si dhe shpërndarjen e ndihmave për familjet në nevojë. Këshilli miratoi një rishikim buxheti për ndihma të tjera ndaj familjeve në nevojë deri në kapërcimin e kësaj situatë të pazakontë.
Bashkia Gjirokastër falë rregullores së re të Këshillit Bashkiak që ka miratuar ka patur mundësi të zhvillojë online mbledhjet e Këshillit edhe pa miratimin e Aktit Normativ nr. 3 të datës. 15.03.2020 të qeverisë, pasi neni 81 i kësaj rregullore ia mundëson në kohë emergjence këtë gjë. Falë asistencës së projektit “Bashki të Forta”, një projekt i financuar nga Agjencia Zvicerane për Bashkëpunim dhe Zhvillim (SDC), këshillat bashkiakë kanë mundësi të veprojnë në mënyrë funksionale dhe në kohë emergjencash për të adresuar shërbimet ndaj qytetarëve.
©argjirolajm.net
