Kampionati po bën “pushim”, pasi vëmendja është tek ekipi përfaqësues, i cili sot në mbrëmje do të zhvillojë ndeshjen e radhës kualifikuese për Euro2020, në grupin H, një duel përballë Francës që ka domethënie për vazhdimësinë e këtyre eliminatoreve dhe për objektivat e kuqezinjve.
Superiorja po rimbledh energjitë e saj për të bërë një tjetër start pas 10 shtatorit, por dukshëm klubet po studiojnë terrenin, po njihen me kapacitetet e tyre dhe me rivalët në garë, pa i ndërprerë zhvillimet e brendshme. madje ka klube që po bëjnë ende blerje të reja, duke shfrytëzuar klauzolat e rregullores që lejon brenda kornizës ligjore vetë FSHF-ja. Por ka dhe klube që nuk e kanë gjetur ende ritmin e kërkuar dhe një prej skuadrave që ka probleme në këtë pjesë të parë të kampionatit është padyshim Luftëtari.
Shihet si një prej tri skuadrave që rrezikojnë rënien këtë sezon, pasi nuk ka grup cilësor dhe në media përflitet se situata financiare nuk është më e mira e mundshme. Stafet teknike janë ndërtuar shpesh muajt e fundit dhe Luftëtari nuk po gjen qetësi. Madje dhe Klodian Duro që u emërua me nxitim në fillim të sezonit ka lënë stafetën për një tjetër, e këtë herë bëhet fjalë për një grek, Jorgos Marantas, me eksperiencë në kampionatin helenik të kategorive inferiore. Vetë Duro ka marrë pozitë drejtuese në klub, në rolin e drejtorit teknik, por në një klub ku kriza është e gjithanshme natyrisht që kjo është problematike.
Gjithsesi, “kurbani” i parë në radhët e bankinave të Superiores ndodhi pikërisht nga Gjirokastra, ku Luftëtari shkarkon Duron por të sjellë një teknik grek, të paralajmëruar në media prej dy ditësh. Sipas vetë njoftimit zyrtar të klubit gjirokastrit, trajneri i ri i skuadrës do të jetë greku Jorgos Marantas. Kështu, tekniku do të nisë menjëherë detyrën ndërsa do të marrë postin e lënë bosh nga Klodian Duro, i cili do të vazhdojë detyrën e tij në klubin gjirokastrit si drejtor teknik. Në këtë formë, konfirmohet edhe lajmi i medieve sportive për emrin e trajnerit grek Marantas te Luftëtari.
Njoftimi i klubit të Luftëtarit
Bluzinjtë gjirokastritë mbajtën një qëndrim të shkurtër zyrtar për lëvizjet e bërë, duke konfirmuar ardhjen e trajnerit grek dhe qëndrimin e skuadrës në hullinë e pretendimeve të saj në Superiore. “Trajneri i ri është Jorgos Marantas. 46-vjeçari grek, drejton që nga viti 2008, dhe të gjithë karrierën e tij ka qenë në krye të ekipeve inferiore greke. Disa prej skuadrave që ka drejtuar Marantas janë PAS Lamia, Panahaiqi, Kavala, Trikala apo Panelefsiniakos.
Ekipi i fundit i tij ka qenë Aris Avatou, në krye të cilit ka qenë nga korriku i 2018-ës, deri në shkurt të 2019-ës”, shkruhet në njoftimin e klubit të Luftëtarit. Është një njoftim i shkurtër por domethënës, për vetë zhvillimet që kanë prekur klubin gjirokastrit, ndërkohë që situata nuk duket aspak premtuese, pasi grupi nuk ka shumë cilësi dhe Luftëtari është realisht skuadra “favorite” për të rënë nga kategoria.
Klubet në krizë
Nuk është vetëm Luftëtari që po përjeton krizë. Është dhe Flamurtari i Vlorës, i cili ka shkurtuar shpenzimet dhe kjo do të thotë se klubi nuk mund të bëjë blerje të fuqishme as në janar. Gjendja e grupit nuk është më e mira dhe Flamurtari nuk ka një grup pretendent. Jo vetëm kaq, por edhe situata me administratorin e klubit, zotin Idrizi, nuk është më e mira dhe Flamurtari i këtij sezoni është skuadër që rrezikon rënien.
Nga ana tjetër, Skënderbeu, megjithëse ka një staturë tjetër dhe një grup më cilësor, rrezikon, pasi moralisht ekipi është i shigjetuar pas vendimit të UEFA-s për penalizim 10-vjeçar nga garat europiane, si dhe një çështje që endet dyerve të gjykatave europiane. Pra Skënderbeu rrezikon dhe kjo i vjen nga shkaqe jashtë sportive. Skuadra tjetër që ka shenja krize është Vllaznia, e cila është e varur nga buxheti i bashkisë së Shkodrës, por kjo e fundit është në krizë politike, pasi nuk ka ende një titullar të njohur nga gjykata.