Përtej premtimeve të presidentit Grigor Tavo, dhënë pas përfundimit të sezonit futbollistik 2018-2019, se skuadra e re do të jetë rivalizuese mes më të mirëve në sezonin e pritshëm, asgjë e tillë s’mund të thuhet tani për këtë klub.
Lojtarë nën kontratë, me mendje dhe zemër për të qenë pjesë e bluzinjve sezonin 2019-2020, por mbeten të befasuar, pasi askush nga drejtuesit e Luftëtarit s’bëhet i gjallë për vijimësinë. Edvan Bakaj, “gardiani” 31-vjeçar i Luftëtarit, pjesën e dytë të sezonit është lojtari i tipit model, që pasionin me futbollin, jo domosdoshmërish e kushtëzon me financat pas nënshkrimit të kontratës së re me Tiranën.
Për “Panorama Sport, Bakaj, një ditë pas firmosjes me skuadrën kryeqytetase, tha: “Falënderoj të gjithë njerëzit që më kanë mbështetur në Gjirokastër, presidencën e të tjerë. Zgjodha Tiranën si klubin më të titulluar në Shqipëri. Jam pranë familjes, një arsye më shumë që si portier prej kaq vitesh, eksperiencën time më duhet ta vendos në shërbim të Tiranës. Luftëtarit, për të cilin kam nostalgji të veçantë, i uroj sa më shumë suksese në vijimësi. Uroj që tradita e shkollës së portës gjirokastrite të vijojë për mirë!
Profesor Ruzdi Lamaj më ka qëndruar pranë e nga portreti i këtij njeriu duhet të marrin shembull të gjithë brezat që duan të mbrojnë portën e Luftëtarit”, përfundoi Bakaj. Rrezikon starti i përgatitjeve Data 15 korrik pritet të shënojë startimin e përgatitjeve për sezonin 2019-2020. Lojtarë të heshtur, por të zhgënjyer, drejtues të klubit, të cilët s’denjojnë për të thënë një fjali të vetme. Ç’do të bëhet me Luftëtarin e ri? “Në vesh të shurdhët dhe në gojë të memecëve… Asgjë nuk kuptohet, Zoti qoftë me Luftëtarin!”, thonë për “Panorama Sport”, ata që më herët, nën zë, kanë bërë kritikun. Premtimet e presidentit Grigor Tavo në mbyllje të sezonit të fundit se Luftëtari do të ecë në gjurmët e sezoneve 2016- 2017 dhe 2017-2018, duket se i ndanë mes tyre postulati: “Nga e thëna në të bërë është në mes një det i tërë…”./PanoramaSport