Pjesëmarrja e parë historike në Europë ka ngjallur oreksin e klubit të Luftëtarit për të qenë përsëri pjesë e futbollit të rëndësishëm, edhe pse aventura e parë përfundoi mes telashesh dhe akuzash të rënda. Por nuk do të jetë e thjeshtë, ndonëse është ruajtur pjesa më e madhe e grupit që arriti të këtë objektiv një vet më parë.
Megjithatë, ata që u larguan ishin ndër emrat kryesorë që siguruan kualifikimin historik dhe prova e vërtetë do të jetë të përsëritet gjithçka pa emra si Bregu e Abazaj në fushë, apo edhe Hasan Likën në stol. Në skuadër kanë afruar trajner të ri dhe emra të rinj për sulmin, por të gjithë presin të shohin se si do të jetë ky Luftëtari i ri në vazhdimësi, pasi ai i Europës sigurisht nuk la asnjë shije pozitive.
Skuadra
Në Gjirokastër vazhdon të përdoret një traditë e çuditshme me portën, pasi kërkojnë portier nga çdo vend i mundshëm edhe pse kanë Ruçin në përbërje. Ndërkohë, janë bërë lëvizje edhe në prapavijë me afrimin e Jançiç në mbrojtje, ndërsa do të adaptohen lojtarë në krahun e djathtë derisa të kthehet Jakovljeviç nga dëmtimi.
Por problemi më i madh është faza ofensive, ku lamtumira e Bregut dhe Abazajt ka bërë që trajneri i ri të fillojë gjithçka nga e para në caktimin e skemave të skuadrës. Milosavljev dhe Ymeraj pritet të jenë si fillim lojtarët që do të ndihmojnë ekipin në fazën ofensive në lojën nga krahët, në mbështetje të Shkurtajt i cili vazhdon të jetë titullari i paprekshëm në qendër të sulmit.
Afrime
Hrvoje Bukovski, Nemanja Jançiç, Vladan Milosavljev, Romario Cekaj, Aldrit Oshafi, Maldin Ymeraj, Eraldo Hyseni, Donaldo Açka, Aristotel Bellai, Sebastian Molla, Ilia Melka, Elian çelaj, Balsha Radoviç.
Largime
Kristal Abazaj, Dejvi Bregu, Orjad Beiqri, Kristos Athanasopulos, Bruno Toledo, Marko Aurelio, Kristo Minga, David Bocaj, Kejdi Balla, Adnand Shkurtaj, Eri Lamcja, Ardit Zijai.
Trajneri
Afrimi i Milosh Koshtiç ka sjellë jo pak pakënaqësi në Gjirokastër, për faktin se askush nuk e kuptoi se pse u largua një trajner si Hasan Lika, i cili dërgoi skuadrën në Europë për herë të parë në histori. Edhe prova europiane nuk shkoi ashtu siç pritej, ndaj për sllovenin, do të jetë shumë e vështirë të bindë publikun që në fillimet e tij.
Nuk ka shumë eksperiencë në drejtimin e skuadrave, por në Gjirokastër insistojnë se kanë trajnerin e duhur për të bërë hapin e radhës, pasi pavarësisht suksesit të Likës, besojnë se teknikët e huaj janë më të përshtatshëm. Eksperiencat e tij te klube si Zheljeznicar dhe Iraklis nuk shkuan edhe aq mirë, ndaj tani me Luftëtarin ka mundësi të provojë vlerat e tij në këtë profesion.
Problemet
Aventura europiane më shumë i prishi punë Luftëtarit sesa ndihmoi skuadrën për të bërë hapin e radhës. Tifozeria gjirokastrite mund të mos ia falë skuadrës ato dy ndeshje me Ventspils dhe me një stadium të boshatisur e pa shumë nga protagonistët e sezonit të kaluar në përbërje, gjirokastritët rrezikojnë të përballen me probleme edhe në fushën e tyre, ku zakonisht kanë qenë më të qëndrueshëm.
FORMACIONI I MUNDSHËM