“Zgjohen” te Luftëtari. Pas tërheqjes së Grigor Tavos, aksionerët e tjerë të klubit (Bekim Halilaj, Aleksandër Nasto dhe bashkia Gjirokastër) janë vënë në lëvizje për të mos lënë skuadrën në mëshirë të fatit.
“Panorama Sport” zbulon ekskluzivisht se është emëruar trajneri dhe drejtori i ri teknik. Bëhet fjalë për emra shumë të njohur, të cilët si për koicidencë janë të dy nga Elbasani. Trajner do të jetë Klevis Dalipi, ndërsa në rolin e drejtorit teknik, ish-mesfushori i Kombëtares, Klodian Duro.
Lajmi konfirmohet zyrtarisht edhe nga aksionerëte klubit për gazetën. Pritet që stërvitja të nisë të dielën në Gjirokastër, ku dhe do të bëhet prezantimi i stafit të ri. Gjatë ditëve të fundit aksionerët kanë pasur komunikim të vazhdueshëm me FSHF për zgjidhjen e problemeve, në mënyrë që të licencohen. Aksionerët kanë garantuar se do të plotësojnë çdo kërkesë, në mënyrë që klubit të mos ketë probleme për licencimin në Superiore.
Ndërkohë, sa i përket lojtarëve, nga sezoni i kaluar kanë mbetur emra si Donald Rapo, Aurel Demo, Maldin Ymeraj, Donaldo Açka, Erald Hyseni, Aldrit Oshafi, Armenis Kukaj dhe disa të rinj. Në këto kushte, kërkohet që klubi të futet urgjentisht në merkato për të forcuar ekipin. Nuk përjashtohet mundësia të ketë edhe ndonjë rikthim të lojtarëve që kanë qenë nën kontratë dhe kanë shpallur divorcin./ panorama
