Në Superiore janë luajtur vetëm dy javë, por në Gjirokastër ka filluar që tani paniku se skuadra e këtij edicioni mund të mos jetë në lartësinë e viteve të kaluara dhe rrezikon seriozisht rënien nga kategoria. Mes atyre që kanë mbetur të zhgënjyer nga paraqitjet e Luftëtarit në këto javë të para është edhe legjenda gjirokastrite Dhori Kalluci, i cili mendon se ekipi duhet të përqendrohet vetëm te lufta për mbijetesë pasi këtë sezon është e kotë të pretendojë për më shumë.
“E vërteta është që kampionati u nis jo premtues se dy ndeshjet e para u humbën, një brenda e një jashtë. Mund të justifikohet ndeshja jashtë, pavarësisht se u humb në minutën e 96. Por nuk mund të justifikohet ndeshja e humbur këtu me Kastriotin, e cila ishte e para në kampionat dhe ndaj një ekipi të sapoardhur në Superiore. Nuk na vjen mirë që humbëm, por do të thosha që nuk është fundi i botës se kampionati është i gjatë. Vetëm se unë do të sugjeroja që ekipi të ketë parasysh të luftojë për mbijetesë, të mos ketë pretendime për më lart”, tha ai për TVSH.
Sipas tij, përbërja aktuale lë shumë për të dëshiruar për faktin se trajneri Koshtiç nuk ka alternativa për titullarët. “Me dyshim kam akoma përbërjen e ekipit se nuk ka përfunduar dhe nuk di se çfarë do të bëhet në ditët e fundit. Do të thosha për këtë fillim, me atë që kam parë me Kastriotin, stoli është shumë i ri, pa eksperiencë, gjë që do ta vuajë ekipi”, deklaroi ai.
