Shpëtohet nga rrënojat në Thumanë Lindita Cara. Sapo është nxjerrë nga zjarrfikësit grekë, e reja është dërguar me urgjencë në spital. Ndrëkohë që ende vijojnë operacionet e shpëtimit në Kënetë, Durrës dhe Thumanë.
Familja Cara kishte mbetur nën rrënoja që prej orëve të para të mëngjesit. I pari që ia doli që të shpëtonte ishte babai i saj Robert Cara, ndërkohë që ende nuk dihet fati i nënës së saj dhe tre vëllezërve të tjerë.
22 të vdekur, mbi 600 të plagosur, dhe dhjetëra të tjerë nën rrënoja, është ky bilanci i një ditë që do të mbahet mend gjatë si tragjedia e 26 nëntorit 2019. Epiqendra e tërmetit ishte qyteti i Durrësit, dhe konkretisht zona e Thumanës, ku ka patur 3 pallate të shembura, ndërkohë që problemet nuk mungojnë as në Fushë-Krujë, apo te Kavalishenca, ku mbeti i vdekur kryekomisari Bajram Hajdarmataj.
Gjithë shteti ndërkohë është në Durrës, ku po punohet për të shpëtuar jetët që ndodhen nën rrënoja. Ndërkohë, që edhe lëkundjet nuk kanë ndaluar. Herë pas here, me magnitudë shumë më të ulët dhe me fuqi më të vogël goditjeje, toka në Tiranë dhe Durrës vijon të dridhet.
