Provokim për të tërhequr vëmendjen, taktikë politike për të mbledhur vota apo mendjehapësi e Flamur Golemit, kjo nuk dihet ende me siguri. Kryebashkiaku i Gjirokastrës vazhdon ‘flirtin’ me të djathtët. Disa muaj pasi pastroi varrezat e ballistëve në Gërhot, sot ai është shfaqur në kalanë e qytetit me drejtuesit e shoqatës antikomuniste, ish-deputetë të PD-së, Enkeled Alibeiaj e Luan Baci, kryetarin Dasho Aliko, ish-kryetarin Roland Bejko e shumë përfaqësues të tjerë të së djathtës. Nderuan viktimat e regjimit komunist në burgun e “Shtatë Penxhereve”. Golemi ka publikuar në faqen e tij në Facebook edhe fotot nga kjo ceremoni teksa shkruan se nëse historia harrohet, rrezikon që ajo të përsëritet në të ardhmen. Në ceremoni pati gjithashtu shtrëngime duarsh me zyrtarët e PD-së, buzëqeshje dhe komplimente të ndërsjellta.
Postimi i plotë i kryebashkiakut
Burgu famëkeq i “Shtatë Penxhereve” në Kalanë e Gjirokastrës është dëshmi e gjallë e mizorisë që përjetuan shumë shqiptarë nga katër regjime të ndryshme. Bashkë me përfaqësues të shoqatës së ish të përndjekurve politikë dhe fondacionit gjerman “Konrad Adenauer” nderuam ata që humbën jetën në këtë burg. Secili të mbajë pjesën e vet të historisë, si dhe aftësinë e arsyetimit apo gjykimit për të shkuarën. Unë dua të shikoj përpara dhe të punoj që mbi rrënojat e së shkuarës të ngrihet një ardhme më e mirë për të gjithë. Sot ky burg është pjesë e trashëgimisë tonë historike, evokon çmendurinë e një kohe tjetër që nuk kthehet më dhe na duhet gjithashtu si objekt në funksion të turizmit. S’kisha hezitim të shkoja në këtë ceremoni kur mora ftesën nga organizatorë pasi mendoj, se nuk duhet të harrojmë të kaluarën, ndryshe rrezikojmë që ajo të përsëritet në të ardhmen.
