Ish-ministri i Punës, Kosta Barka do të jetë ditët e ardhshme ndoshta para dilemës më të madhe të jetës deri më tani. Të hyjë në Kuvend si deputet, duke marrë mandatin e lenë nga Tritan Shehu në Gjirokastër apo t’i bindet verbërisht vendimit absurd të Lulzim Bashës dhe Monika Kryemadhit? Kjo është çështja!
Pasi Mimoza Çomo refuzoi të pranonte mandatin, radha do t’i vijë Kosta Barkës. Ai është renditur i treti në listën e PD-së në qarkun Gjirokastër për zgjedhjet e qershorit 2017. Me dorëheqjen e Vangjel Tavos, minoriteti grek në Dropull nuk e ka më një deputet në Parlament. Mungon natyrisht edhe Vangjel Dule.
Të lësh pa përfaqësim në Kuvend një numër të madh banorësh të Dropullit vetëm për shkak të krizës së lidershipit të Lulzim Bashës e Monika Kryemadhit, është një vendim i gabuar. Prandaj Kosta Barka duhet ta pranojë mandatin e deputetit dhe të hyjë në Kuvend, njësoj siç bëri bashkombasi i tij Ligoraq Karamelo në Korçë. Barka e di shumë mirë që valenca më e madhe politike është pikërisht në Parlament, jo në kafenetë apo restorantet e Dropullit dhe as në takimet me Tritan Shehun e Dasho Alikon në Gjirokastër.
Ish-ministri është drejt fundit të karrierës politike. Nuk ka më asnjë shans që në zgjedhjet e ardhshme parlamentare të hyjë në Kuvend si deputet. Ndoshta s’ka për të qenë në lista as thjesht si numër. Kjo është mundësia që ai duhet të mos e shpërdorojë. Të pranojë mandatin e lënë nga Tritan Shehu dhe të përfaqësojë Dropullin e Parlamentin e Shqipërisë.
Nuk është mëkat dhe as turp që Kosta Barka të futet në Kuvend. Ai merr një mandat si pjesë e listës së partisë së tij. Nuk po ndryshon parti dhe as po bën pazar. Demokracia është pjesëmarrje, jo përjashtim. Lulzim Basha dhe Monika Kryemadhi kanë dalë nga Kuvendi për hallet e veta. Kosta Barka duhet të hyjë në Kuvend të përfaqësojë dropullitët, të cilëve u kërkoi votat 2 vjet më parë.
©argjiroja.net
