“As qesh dot, as qaj dot. Nesër po ju ftoj të ndajmë bashkë disa vendime. M’u duk një gjë e tipit ‘je i pafajshëm, po nuk kemi këllqe ta themi’”.
Ky ishte komenti i parë i ish-ministrit të Brendshëm, Saimir Tahiri, pas vendimit të Gjykatës, edhe pse fillimisht u kërkoi mirëkuptim gazetarëve për të folur në një moment të dytë. Ai tha se për dy vjet është trajtuar si trafikanti më i madh i Shqipërisë, ndërsa Gjykata tashmë thotë se nuk e ka bërë këtë vepër penale.
“Çfarë t’ju them? Dy vjet jam trajtuar si pjesë e një grupi kriminal, sot Gjykata thotë që nuk e ke bërë këtë. Meqë kushërinjtë kanë përdorur emrin tim, unë kam shpërdoruar detyrën. Ca t’ju them unë, zoti ju ruajttë, mos t’ju përdorë njeri emrin. Prisni deri nesër se edhe mua më duhet kohë ta kuptoj këtë që ndodhi. Gjykata tha që nuk je trafikant, nuk je kriminel, por meqë ca kushërinj kanë përdorur emrin tënd dhe ti ishte ministër, ke shpërdoruar detyrën. Duhet të gjej rrugën që të lexoj një vendim të tillë, për mua qesharak. Do ishte shumë më fisnike, ta kishin bërë si burrat, të më kishin dënuar për trafikun, kështu është edhe qesharake”, u shpreh mbrëmë Tahiri.
Duke ironizuar, ai tha se më mirë ta kishin dënuar për trafik droge sesa dënimin që i dhanë, ndërsa theksoi se do ta apelojë vendimin.
“Do ishte shumë më fisnike, ta kishin bërë si burrat, të më kishin dënuar për trafik droge, kështu është edhe qesharake. Sigurisht që do ta apeloj. Isha më i qartë kur hyra. Është njëlloj si të hysh në një provim, të thotë mësuesja shumë mirë je përgatitur, por do marrësh 5. Si t’ia bëj, për të gjithë kushërinjtë idiotë në fis duhet të mbaj përgjegjësi?! Ju falënderoj se për dy vite keni ndjekur procesin e shekullit dhe u katandis kokoshi në thelë”, u shpreh Tahiri.
REAGIMI
Vetëm disa minuta pasi doli nga ambientet e Gjykatës së Krimeve të Rënda, ish-ministri i Brendshëm, Saimir Tahiri, ka reaguar sërish. Në rrjetin social “Facebook”, ai ka postuar edhe një video, ku ka risjellë në vëmendje një deklaratë të bërë më 1 nëntor të vitit 2018. Ndërsa shkruan se beteja e tij sapo ka filluar.
“Nuk të themi dot që je i pafajshëm, kështu që po të dënojmë pak fare. Kështu e kuptova sot. Beteja ime sapo ka filluar. Faleminderit të gjithëve për mbështetjen”, shkruan Tahiri në “Facebook”.
Edhe pse i ranë të gjitha akuzat e Prokurorisë, Saimir Tahiri ishte i bindur se dënimi i Gjykatës ishte absurd dhe për këtë, vendimin do ta apelojë. Ai tha se nuk mund të mbajë përgjegjësi për çdo idiot në fis që përmend emrin e tij, duke shtuar se do të rilexojë vendimin për të kuptuar më shumë lidhur me vendimin e Gjykatës.
Ish-ministri u shpreh se ishte më i qartë para se të futej për t’u njohur me vendimin, sesa kur mësoi se ishte dënuar pse disa kushërinj idiotë kishin përmendur emrin e atij.
“Më rezervoni të drejtën ta përtyp një herë këtë estradë që ndodhi. Me sa kuptova, Gjykata më tha që nuk jam kriminel, nuk jam trafikant, nuk jam pjesë e një grupi kriminal, por me gjithë ca kushërinj të mi, që kanë përdorur emrin tim, unë kam shpërdoruar detyrën. As qesh dot, as qaj dot, por nesër po ju ftoj të ndajmë bashkë ca mendime. Ku di unë, m’u duk një gjë e tipit, je i pafajshëm, po s’kemi këllqe të ta themi. Prisni deri nesër, unë nesër do të komunikoj me mediat. Sot, Gjykata më thotë nuk ke bërë trafik droge, nuk ke ndihmuar në trafik droge, por meqë kushërinjtë paskan përdorur emrin tim, unë kam shpërdoruar detyrën. Kjo është vetëm maja e betejës sime. Prisni deri nesër, edhe mua më duhet kohë ta kuptoj këtë që ndodhi”, tha Tahiri pas vendimit.
