Pas barazimit 0-0 me Luftëtarin, trajneri Ardian Mema i skuadrës së Tiranës ka pohuar: “Mendoj që ekipi ka luajtur mirë, madje edhe në pjesën e dytë kemi sulmuar dhe e kemi kërkuar golin. Nuk kemi pasur fat të shënojmë gol, ashtu si nuk kemi pasur edhe shanse të mira. Ky është futbolli dhe duhet që të shohim ndeshjet në vazhdimësi. Kjo është ndeshje kupe dhe ka specifikat e veta. Ekipi ka luajtur me hope, kemi luajtur mirë, por kemi bërë edhe gabime. Në kampionat edhe pse nuk jemi si në kupë ekipi ka bërë edhe paraqitje shumë të mira. Tashmë jemi para një përgjegjësie shumë të madhe. Ne si staf dhe lojtarët, sepse gjendja në tabelën e renditjes është shumë delikate. Duhet që të kishim shfrytëzuar rastet që kemi pasur”, – tha Mema në fillim të prononcimit.
Sulmi
Lidhur me sulmin dhe me alternativat pas mungesës së Ngosë, trajneri Mema ka shtuar se: “Nuk besoj se kemi shpenzuar shumë energji, ka qenë një lojë me topin në zotërim, por duke pasur parasysh edhe kundërshtarët përkatës. Sa i përket mungesës së Ngosë dhe alternativës në sulm, Majkëllin duhet që ta sjellim në formë sepse nuk është si para disa javësh. Ky ekip ka kualitete edhe në sulm. Është Halili e ndonjë tjetër. Do ta mendojmë mirë për të hedhur në fushë alternativën më të mirë”.
Dueli në kampionat
Të dielën, Tirana ka një tjetër betejë delikate me gjirokastritët, e vlefshme për kampionatin dhe shumë e rëndësishme për duelin e mbijetesës. “Unë shpresoj që skuadra të jetë më agresive në kampionat, mendoj se po të luajmë si sot mund të ndryshojmë edhe balancat e lojës. Deri në ndeshjen e radhës, sa iu përket lojtarit që do të kërkojmë golin, në mungesë të Ngosë me kartonë do të përgatisim ndeshjen me lojtarët që kemi në formë më të mirë. Do ta mendojmë mirë me stafin dhe do të fusim në fushë lojtarin që do të na shërbejë më shumë për ndeshjen e kampionatit.”, – tha Mema në fund të prononcimit pas ndeshjes me Luftëtarin.