Hetimet e UEFA-s për Luftëtarin, Jupi: Duhen dënime që të zënë mend


Na ndiqni në Facebook, Instagram dhe Youtube:
  • Facebook
  • Instagram
  • Youtube

Ish-futbollisti i kombëtares, Redi Jupi, e ka cilësuar një goditje të dytë të rëndë për futbollin atë që ka ndodhur me Luftëtarin që është bërë pjesë e hetimeve të UEFA-s. Në “Procesi Sportiv”, ai deklaroi se mendonte se kishte ardhur koha që të ketë ndëshkime të rënda edhe në Shqipëri për të gjithë ata që shkelin rregullat me trukime.

“Nuk mendoja se do të ndodhte prapë një gjë e tillë, sidomos pas problemeve me Skënderbeun, ishte një dënim që dha një sinjal, ka pasur edhe më parë, dënimi që u dha e njollos futbollin shqiptar në një mënyrë të tillë në të cilën ne duhet të reflektojmë se si të ringrejmë sistemin. Nuk mendoja që do të përsëritej te një ekip tjetër shqiptar, që po bënte mirë, simpatik, që kishte zgjuar interesin e publikut, po bëhej tifoz me ta një pjesë e madhe e publikut shqiptar, me futbollin që po bënin, lojtarët që kishin, i bënë tifozë të gjithë. Kjo ishte goditja më e madhe që mund t’i jepnin kampionatit.

Më la shije të keqe që kur shkarkuan Likën. Ekipi më i mirë i sezonit, trajneri më i mirë i sezonit, e largoi. Kështu bënte Tirana se në fund i shkarkonte trajnerët edhe kur merrnin titull. Por Luftëtari, që vinte nga kategoria e parë luftonte për mbijetesë, shkon në Europë dhe këtë trajner e shkarkojnë. Njerëzit që punojnë, lojtarët, trajnerët, nëse nuk respektohen në mënyrën e duhur nga një skuadër tregojnë çfarë pripje ka skuadra ndaj futbollit

Në stadin që jemi, ekonominë që ka Shqipëria, me njerëzit e biznesit, nuk është momenti për të privatizuar klubet, duhet t’i mbajë bashkia ose të gjejë mënyrë tjetër. Nuk kemi individë që të përfaqësojmë një qytet, si mund t’ia lësh Dinamon apo Tiranën një individi të vjetër. Nuk është faji i individëve por i kësaj shoqërie, kapitalizmi shqiptar që nuk mund të nxjerrë aq të pasur dhe aq me integritetin e duhur. Kur një klub nuk pyet për trajnerin e lojtarët, si mund të pyesë për futbollin në fushë. Ka ardhur koha që përveç dënimit nga UEFA të ketë edhe të brendshëm, që të heqin dorë nga ky muhabet”, tha Jupi.