‘Habit’ Dasho Aliko: Qeveria bëri shumë mirë që luftoi hashashin. Lazarati paguan më shumë taksa nga të gjithë


Na ndiqni në Facebook, Instagram dhe Youtube:
  • Facebook
  • Instagram
  • Youtube

Partia Demokratike mblodhi sot aktivin e saj të degës së Gjirokastrës. Ish-kryetari i Komunës Lazarat, Dasho Aliko, që prej pak kohësh drejton PD-në, tha ndër të tjera gjatë fjalës së tij se qeveria bëri shumë mirë që luftoi hashashin. Por sipas tij ky fshat po diskriminohet.

‘Qeveria bëri shumë mirë që luftoi hashashin, por nuk bëri mirë që luftoi njerëzit. Sepse ne kemi historik të hidhur me Partinë Komuniste. Lazarati gjithmonë është mbajtur si armiku i popullit. Kjo parti, kjo qeveri absolutisht këtë mendim ka akoma. Nuk jep asnjë thërrime për Lazaratin edhe pse është një nga taksapaguesit më të mëdhenj në territorin e Gjirokastrës. Zero investime, zero mirëmbajtje. Qeveria nuk kujtohet, projektet i ka gati që në kohën e ish komunës”, tha Aliko.

Kujtojmë që Dasho Aliko ka drejtuar Komunën Lazarat gjatë gjithë viteve kur kjo zonë ishte shndërruar në ‘hambarin’ më të madh të kanabisit në mbarë Europën. Sa i përket asaj që thotë Aliko se Lazarati është nga taksapaguesit më të mëdhënj në vend, le të mos harrojmë gjithashtu edhe një fakt tjetër. Lazarati nuk paguante energjinë elektrike për shumë vite me radhë, sidomos kur në pushtet ishte Partia Demokratike. Sidoqoftë pas shkatërrimit të parcelave me hashash, Lazarati sot vuan mungesën e investimeve njëlloj si shumë fshatra të tjera të qarkut dhe mbarë vendit.

©argjirolajm.net