Kur u hodh shorti i Kupave të Europës, për Luftëtarin u tha se ishte ekipi shqiptar me më shumë shanse për të kaluar turin, por gjirokastritët ishin katastrofë në ndeshjen e parë në transfertë me Ventspils, duke lënë të habitur edhe kundërshtarin. 

Luftëtari pësoi 5 gola në atë ndeshje, të gjithë që në pjesën e parë. Një zhgënjim total në skuadër dhe në radhët e tifozërisë, që priste një Luftëtar ndryshe. Ajo humbje e thellë ka bërë që interesi për ndeshjen e kthimit, që luhet ditën e enjte, të bjerë ndjeshëm. Madje, parashikohet që stadiumi “Elbasan Arena” të jetë bosh ditën e enjte.

Luftëtari pësoi disa ndryshime gjatë merkatos së verës, duke nisur nga stoli, ku vendin e Likës e zuri slloveni Kostiç. U larguan disa lojtarë, por edhe u bënë shumë përforcime, ndaj dhe pritej shumë nga ekipi, duke besuar se do të kalonte turin e parë.

Por gjërat shkuan keq dhe tani gjirokastriteve u mbetet vetëm të respektojnë garën, duke pretenduar të paktën një fitore ngushëlluese në ndeshjen e kthimit, pasi kualifikimi është i pamundur.