Gjirokastër, shihni kushtet skandaloze të këtij pallati 7 katësh. Banorët bëjnë thirrje për ndihmë (VIDEO)


Na ndiqni në Facebook, Instagram dhe Youtube:
  • Facebook
  • Instagram
  • Youtube

Masakra urbane që është bërë në Gjirokastër ndër vite, me ndërtime vend e pavend, jashtë çdo parametri urbanistik, është vetëm njëra anë e medaljes. Për jo pak pallate është dhënë leja e shfrytëzimit nga Bashkia Gjirokastër ndonëse punimet në objekt ishin të papërfunduara. Një rast i tillë është në lagjen ’11 Janari’. Banorët denoncojnë situatën me të cilën janë të detyruar të jetojnë prej vitesh.

Lagështia nëpër mure është kudo, ndërsa disa dritare të korridoreve të pallatit s’kanë ende xhama dhe se banorët vetë janë detyruar t’i mbulojnë me plastmas. Pallati 7 katësh nuk ka ende një ashensor, edhe pse banorëve iu është thënë vazhdimisht se ai do të ndërtohet. Që prej vitit 2011 kur nisi shitja e apartamenteve ashtu në gjendje të papërfunduar, sipas marrëveshjes së ndërtuesit me blerësit, s’ka asnjë përpjekje për të ndërtuar ashensorin e pallatit, pavarësisht se kjo ishte pjesë e kontratës.

Banorët thonë se vendi ku duhet të vendoset ashensori qëndron ashtu i hapur, duke u kthyer në një rrezik potencial për të ta sa herë zbresin shkallët.  Edhe pse cilësia e punimeve dhe blerja e apartamenteve është tërësisht një marrëdhënie kontraktuale mes dy palëve private, shitësit dhe blerësit, ajo që mbetet pashpjegueshme është se si mund të jepet leja e shfrytëzimit nga Bashkia Gjirokastër, në kushtet  kur objekti është ende i papërfunduar? Ndiqni në videon më poshtë reagimin e vetë banorëve për Tv Gjirokastra.

© ArgjiroLajm.net