Kryebashkiaku i Gjirokastrës, Flamur Golemi, ka qenë në një tjetër kopësht të restauruar. Ai ka shpërndarë fotot në Facebook dhe thotë se tashmë Gjirokastra ka një vëmendje tjetër.
“Mungesa e fondeve nuk është justifikim në çdo rast. Nëse ke vullnetin dhe dëshirën e mirë për të punuar, i gjen paratë dhe fjalët i kthen në vepra. Aq më tepër kur është fjala për fëmijët. Pas restaurimit të çerdhes “Cicërimat” brenda tre javësh, ja tek kemi një shembull tjetër domethënës të përkushtimit tonë për të bërë ndryshimin e madh për të cilin ka nevojë Gjirokastra.
Në pak ditë e transformuam kopshtin “Buzëqeshja”, duke krijuar ambientin që meritojnë fëmijët dhe edukatorët. Falenderoj pa masë partnerët tanë të biznesit që vlerësojnë përgjegjësinë sociale dhe na gjenden pranë. Me buxhetin e ri të bashkisë vitin e ardhshëm do të kemi investime të tjera në shkolla e kopshte.
Na pret një punë e madhe përpara dhe unë besoj se jemi në rrugë të mbarë për të bërë më të mirën për Gjirokastrën. Në fund të këtij albumi kam lënë enkas tre foto, të cilat tregojnë se si ishte kopshti “Buzëqeshja” më parë. Besoj se mjaftojnë për të kuptuar se të shkuarën e lamë pas dhe për Gjirokastrën ka tashmë një tjetër vëmendje”, shkruan Golemi.
