Luftëtari merr Ardit Hoxhajn. Prej ditës së djeshme, sulmuesi është bërë zyrtarisht lojtar i gjirokastritëve. Pas bisedimeve të fundit me presidentin Bekim Halilaj, vlonjati ka arritur akordin dhe, me të mbyllur detajet, është vënë menjëherë nën urdhrat e Klevis Dalipit. Gjatë seancës së pasdites, ai zbarkoi edhe në fushë. Është vetë presidenti më i ri i bluzinjve që e konfirmon këtë marrëveshje për “Panorama Sport”, teksa thotë: “Me Arditin kemi mbyllur gjithçka. Hoxhaj është lojtari ynë për sezonin 2019- 2020”.
Gazeta kontaktoi edhe me vetë 24-vjeçarin, i cili gjithashtu pranoi se do të vijojë karrierën në Gjirokastër. “Po, mbylla gjithçka me presidentin Halilaj dhe nga sot (dje) pasdite jam pjesë e grupit në stërvitje. Asgjë më shumë s’kam për të thënë momentalisht”, u shpreh Hoxhaj.
MERKATO – Përpos “bumit” të lojtarëve në provë, stafi teknik do të vijojë procesin e seleksionimit. Pas seancës së pasdites së djeshme, trajnerit Klevis Dalipi do t’i duhet të kalojë në “sitë” më të mirët. Pa dyshim, një mision i vështirë, por jo i pamundur. Grupi i lojtarëve nën kontratë me bluzinjtë do të kenë “pjesën e luanit”, nisur nga pontenciali dhe eksperienca e sezonit të fundit.
Por drejtuesit e Luftëtarit shkojnë dhe më tej, teksa thonë se klubi do të jetë pjesë aktive e merkatos në këto ditë të nxehta vere. “Jemi në bisedime me lojtarë cilësorë nga kampionati vendës. Ardit Hila dhe Marvin Turtulli janë në dëshirat tona dhe ndaj kemi hyrë në bisedime për shërbimet e tyre. Jemi në bisedime e sipër dhe nga e hëna e pas gjërat do të marrin për mirë. Ju premtoj gjithë gjirokastritëve se do të formojmë ekip kompetitiv, me qëllim pjesëmarrjen në Superiore. Bisedimet vazhdojnë dhe me lojtarë nga tregu i huaj”, u shpreh presidenti Halilaj.
VENDËSIT – Jo larg vëmendjes nga drejtuesit e Luftëtarit do jenë edhe lojtarët e shkollës gjirokastrite. Emra si Andon Karabina, Alvi Ahmetaj, Avernold Qyrani, Sadik Basha, Kristi Camaj, Aristotel Bellaj, Seldion Zholi, Stivi Puci, Eraldo Pula, Geraldo Salaria, e të tjerë në Gjirokastër shihen si e ardhmja e futbollit vendës. Me besimin se dora e ngrohtë mbi supet e njoma s’do t’iu mungojë, lojtarët vendës nuk ngurojnë të stërviten edhe të diferencuar./ Panorama