Janë përfolur të dyja në media si kandidate të mundshme të Partisë Socialiste për Bashkinë Gjirokastër. Dhe deri në zyrtarizimin e emrit nga Edi Rama duket se ato do të bëjnë gjithçka për të rënë në sy, për të tërhequr vëmendjen, për të qenë vizibël sa më shumë të mundin, për të treguar se me Gjirokastrën nuk i lidh vetëm origjina, por edhe se janë aty të kontribuojnë për të.
Është fjala për Artemis Malon dhe Ornela Çuçin. E para zv.ministre e Punëve të Jashtme dhe Europës, e dyta zv.ministre për Turizmin dhe Mjedisin. Sot të dyja ishin në Gjirokastër në një aksion pastrimi dhe mbjellje pemësh, aksione të cilat gati gati janë bërë klishe në Shqipëri sa herë do të dukesh se po bën diçka për komunitetin apo kërkon të demonstrosh aspekte të përgjegjësisë sociale.
Por nuk është thelbi, mungesa le të themi e kreativitetit të Ornela Cuçit dhe Artemis Malos për të modeluar ndoshta një event tjetër se sa thjesht mbjellje fidanësh dhe pastrimi i disa mbetjeve. Natyrisht që ky aksion është i mirëpritur dhe Gjirokastra ka nevojë për pemë të reja dhe pastrim nga mbeturinat. Duke u nisur vetëm nga postimet e tyre në Facebook, zbulon në fakt një rivalitet të madh mes dy zv.ministreve të kabinetit ‘Rama 2’.
Të dyja kanë përjashtuar njëra-tjetrën nga postimet respektive në Facebook, ndonëse kanë të njëjtët persona që i kanë shoqëruar gjatë aksionit. Kjo të le të kuptosh se ka qenë një aksion i përbashkët, me të njëjtët persona që i shoqërojnë zv.ministret, por ato vetë janë kujdesur që të mos e përmendin njëra-tjetrën në postimet që kanë bërë në faqet e tyre.
Nga ana tjetër ka edhe një detaj që s’mund të anashkalohet. Tv Gjirokastra në kronikën e përgatitur me këtë aktivitet, as që nuk e përmend fare zv.ministren e Mjedisit, Ornela Çuçi. Sigurisht që s’ka këtu ndonjë komplot të madh, është thjesht një ‘luftë’ e heshtur mes dy zonjave që aspirojnë për Bashkinë Gjirokastër, edhe pse Ornela Çuçi le të themi se është një hap më larg që pas ngjitjes në skenë me Erion Veliajn si kandidate për Këshillin Bashkiak Tiranë.
Ndërsa Artemis Malo nga ana tjetër do të ‘mbajë frymën’ derisa Rama të zyrtarizojë kandidaturën për Bashkinë Gjirokastër. Nuk është ndonjë merak i madh për ne nëse kanë miqësi apo jo dy zv.ministret me njëra-tjetrën. Vetëm duke u nisur nga postimet e sotme në Facebook, vëren se ka një rivalitet të madh mes tyre, aq sa shkojnë deri aty sa të mospërfillin njëra-tjetrën në një aktivitet ku ishin së bashku. Kjo nuk është rastësi! (Shihni postimet e tyre në Facebook tek fotot më poshtë)
©argjiroja.net
