Flamur Golemi, kandidati i PS-së në Gjirokastër ka vijuar takimet elektorale në lagjen ‘Dunavat’. Gjatë bashkëbisedimit me banorët e kësaj lagje ai ka folur për herë të parë edhe për disa investime të mëdha në Gjirokastër, për të cilat, sic tha Golemi, ai do të punojë gjatë mandati të tij si kryebashkiak i ardhshëm.
Më konkretisht Golemi përmendi ndërtimin e parkingut nëntokësor në Sheshin ‘Çerçiz Topulli’, Bypass-in e qytetit, rikonstruksionin e pallatit të sportit, si dhe ndërtimin e një terminali të transportit urban. Në vijim të fjalës së tij, Golemi kërkoi pjesëmarrje në zgjedhjet e 30 qershorit.
Ai tha se Gjirokastra mund të zhvillohet më tej vetëm duke qenë bashkë; qeveria qëndrore dhe qeveria lokale. Sipas kandidatit socialist Gjirokastra është shumë e madhe për t’u mbajtur peng i politikës së vogël e pa vizion. Golemi tha se Gjirokastra meriton një Bashki që ndërton rrugë më të mira, shkolla më të mira, parqe për fëmijët dhe investime të tjera të domosdoshme.
©argjiroja.net