Deputeti i PS-së, Flamur Golemi duke folur sot në Kuvend për zhvillimin rural hodhi akuza ndaj Bashkisë Gjirokastër për mungesë të vëmendjes ndaj fshatrave.
“Aktualisht në Gjirokastër ka nevojë për ndërhyrje emergjente në rrugët e fshatrave Picar, Golem, Zhulat, Gjat, Hundëkuq dhe disa fshatra të tjerë. Për fat të keq deri më tani gatishmëria e bashkisë për të adresuar problemet e zonave rurale në Gjirokastër ka qenë e ulët. Ndonëse këto fshatra kanë potenciale të shumta për zhvillimin e bujqësisë, agroturizmit dhe blegtorisë, banorët kufizohen vetëm të prodhojnë sa për veten e tyre pasi e kanë të vështirë të dalin në treg”, tha Golemi.
Një çështje tjetër që ai ngriti ishte edhe projekti për ndërtimin e HEC-it në fshatin Kolonjë. Teksa kërkoi që të mos ketë përplasje mes prioriteteve në zonat rurale, Golemi u shpreh kështu:
“Një debat për këtë çështje pati edhe në Gjirokastër disa javë më parë dhe me sa jam në dijeni, për momentin situata është pezull. E kam fjalën për ndërtimin e një HEC-i në fshatin Kolonjë. Investime të tilla janë të mirëpritura, por së pari duhen dëgjuar banorët vendas dhe duhen bërë përllogaritje të sakta për të vlerësuar ndikimin në mjedis dhe ekosistem. Nuk dua të paragjykoj investimin në fjalë, por vlerësoj se ka vend për t’i parë këto projekte me një qasje më kritike në raport me impaktin në mjedis”, tha deputeti i PS-së, i cili përflitet së fundi edhe si një kandidat i mundshëm për Bashkinë Gjirokastër.
©argjiroja.net